險簽隊主帥現身?雲加:哥迪奧拿曾經嚟我屋企想加盟阿仙奴

睇足365 於 18/02/2018 發表 收藏文章
一講到英超球隊阿仙奴,非阿迷經常都會諗起「險簽」兩個字,因為阿仙奴經常同一啲球星傳「緋聞」,又話24小時內公佈,又話無限接近,仲試過話影到希古恩到咗倫敦希思路機場,最終都係不了了之。當中,當然有一部分只係傳媒捕風捉影,或者拎阿仙奴嚟過橋、或者拎阿仙奴嚟開玩笑,但都有啲係雲加親口承認嘅。


一間英超大球會年中聯絡過嘅球員應該真係多不勝數,特別係「雲爺爺」喺球隊多年屹立不倒,佢曾經接觸過而且好接近加盟嘅球員,小弟又相信真係唔少喎,好似識女仔咁,approach過、曖昧過,唔一定可以開花結果,只係阿仙奴有咁嘅形象,傳媒就好少話曼聯、曼城、利物浦、車路士險簽,只會放大阿仙奴險簽,亦都只可以怪雲爺爺有時自己爆響口娛樂大家。雲爺爺最近又有新搞作,就係哥迪奧拿,險簽隊終於搵到領隊。


雲加:佢做得好過我好多

根據外電翻譯,雲加最近接受咗《beIN Sports 》訪問,阿仙奴喺嚟緊歐霸對奧斯達辛斯之後,就會連續喺聯賽盃同英超對曼城,佢就先向對手主帥哥迪奧拿大笠高帽:

「我覺得佢做得比我好好多,而且佢好清楚自己應該要做乜。

佢教過幾支頂級嘅球隊,而且亦都教得非常好。

我尊重佢做嘅嘢,因為佢對於足球有清晰嘅願景,佢有正面嘅態度同正面嘅足球哲學。

就算佢贏唔到波,我都會一樣咁尊重佢,因為佢係嗰種可以影響足球嘅人。呢種對足球嘅正面態度係好重要。」


哥迪奧拿曾經拜訪雲加

雲加又透露,球員時代嘅哥迪奧拿曾經同阿仙奴接觸,有機會加盟兵工廠:

「我曾經同佢傾過幾次。
有一次,球員時代嘅佢,仲嚟咗我屋企。

因為佢想加盟阿仙奴。」

有網民就話記起呢段往事,相信雲加所講嘅時間係2001年,哥迪奧拿喺30歲時以自由身離開巴塞隆拿,同阿仙奴傳出「緋聞」,當時阿仙奴踢法快速直接,雲加最終認為佢踢法不適合而放棄免費簽入佢。結果哥迪奧拿加盟意甲嘅布雷西亞,取代離隊嘅派路,同巴治奧成為隊友,一季之後轉投羅馬。


Source: ManchesterEveningfootball365mundodeportivo

留言


請按此登錄後留言。未成為會員? 立即註冊
  • tinchi3721 於 18/02/2018 評論 NO. 1

    係球員時代既哥迪奧拿喎 唔係領隊時代喎

  • wombat 於 18/02/2018 評論 NO. 2

    { 我覺得佢做得比我好好多,而且佢好清楚自己應該要做乜} 咁即係雲爺爺連自己要做乜都唔清楚🤣

快捷鍵:←
快捷鍵:→