朗尼：早知生涯後期會越踢越後，我向三個人偷師學踢中場

朗尼年少成名，而家已經係曼聯兼英格蘭國家隊入球紀錄保持者，不過因為身型略顯肥胖，香港球迷都叫佢做「月巴」，呢個身型加上年紀漸長體能下滑，喺曼聯最後嘅日子已經較少踢箭頭，而需要退後到中場。即使喺當打之年，朗尼都唔算係單靠速度爆發搵食嘅球員，反而成為佢適應中場位置用腦踢波嘅優勢。


好多球星都會喺生涯後期越踢越後，有時逗後踢組織中場，反而可以運用經驗去彌補體能不足，踢「老鬼波」渙發第二春，當然又唔係個個得啦，例如你叫禾確特、艾朗連儂呢啲淨係識跑、冇帶過個腦落場嘅英式翼鋒去踢組織中場，可能港超都踢唔掂。


今季回歸母會愛華頓嘅朗尼，最近接受利物浦名宿加歷查訪問，就話自己一早已經做好轉型嘅準備：

「我一直都知道，當我生涯去到後期，我會拉後踢中場。

當時我開始喺操練中觀察史高斯踢波。另外，我會分析沙比阿朗素同埋卻奧斯嘅踢法。佢哋唔會全場波不斷衝刺，唔會係咁爆人。

佢哋係喺場上控制節奏嘅球員，我知道我可以去做呢個角色，亦相信自己有咁嘅能力。我覺得只要學到正確嘅方法，我仲有大把貨賣。

其實踢後啲好適合我，我可以掂多啲波，拎波嘅時候有更多隊友喺我身邊，我係一個可以幫到球隊用波嘅人。」

原來朗尼嘅參考對象係史高斯沙比阿朗素同卻奧斯，前兩位都已經退休，難得嘅係朗尼唔介意講自己有學卻奧斯踢波，呢位皇馬中場固然係世界級，但佢年紀比朗尼輕，勉強都算係「後輩」，朗尼參考卻奧斯嘅踢法，反映只要係喺某方面勁過佢嘅人，佢都願意虛心學習，而且唔介意講出嚟，呢一點都值得其他後輩學習嘅。

另外，32歲嘅朗尼都透露，佢願意喺退役之後留喺愛華頓學教波，甚至成為領隊，又話自己可能喺下季開始兼任一部分U14教練工作學下嘢喎。

Source: Sportbible、Telegram