40歲保方復出勇救12碼　艾歷尼：「保方就係保方！」

正所謂「保方保方，保住後方」，意大利老牌門將保方，似乎無論咩年紀，咩狀態，都照樣屹立不倒。另一邊廂，同樣係老牌門神嘅35歲阿仙奴門將施治，喺英超對史雲斯一仗，處理隊友回傳失誤，送禮俾對手導致失波，而球隊亦以1-3爆冷不敵榜尾嘅史雲斯，顯得最近啱啱年滿40歲嘅保方更加老而彌堅。


喺意大利盃四強，祖雲達斯作客阿特蘭大，祖記憑希古恩喺開賽3分鐘入波以1-0險勝，今仗復任正選嘅門將保方扮演重要角色。

比賽第25分鐘，球證透過 VAR 視像助理裁判系統，判斷祖記守將貝拿迪亞喺禁區內犯手球，阿特蘭大由艾真度高美斯主射，俾保方喺濃霧中捉路救出。

https://streamable.com/jz273
雖然今仗係佢自上年12月受傷以嚟，首次喺正式比賽中上陣，但絕對冇「瞌眼瞓」，比賽末段佢再救出對手一記單刀近射，力保不失。
https://streamable.com/52u7y
賽後，祖雲達斯主帥艾歷尼大讚保方表現：「我為保方而高興，佢已經五年冇打過意大利盃。就算已經45日冇正式比賽，佢都冇忘記學過嘅嘢。」

「佢休息咗幾個星期，可能雖然操返fit，不過佢已經返咗嚟，佢係我哋嘅一號門將。喺仍缺陣期間，施捷斯尼表現得非常好，不過保方就係保方。」

Source: Sky Sports、ESPN