前巴塞門將域陀華迪斯掛靴,從網絡世界人間蒸發

睇足365 於 03/01/2018 發表 收藏文章
唔係個個球星都鍾意做埋「藝人」,成日喺公開場合帶住面具做人,又要玩社交網絡同球迷互動,follow / unfollow 一個人都可能俾傳媒補風捉影。有一啲球星性格比較內向,就唔太鍾意玩社交網絡,不過大家未必估到原來域陀華迪斯都係呢種人。


出身自巴塞青訓營嘅域陀華迪斯,2015-16球季轉投曼聯得唔重用,2016-17球季過到米杜士堡拎返主力門將之位,只係踢咗一季就約滿離隊。「VV」雖然唔係一個超級穩定嘅世界級門將,有時都幾「神經刀」,甚至間中會「派膠」,但好歹為巴塞上陣530場比賽 (各項賽事),正面撲救能力都屬於頂級,加上喺巴塞浸淫出一定嘅腳下功夫,喺當今球壇對門將嘅要求下,應該都仲有唔少球隊想得到佢。


35歲,門將生涯先啱啱步入晚期,但佢竟然喺離開米堡之後,拒絕多間球會嘅邀請。當時包括拉科魯尼亞、貝迪斯、拉斯彭馬斯等西甲球隊都向佢招手,但佢冇接受任何邀請。2017年8月,《ESPN》都報導過,域陀華迪斯已經決定唔再踢波,轉而專注喺電視業務,唔少傳媒都報導VV退役嘅消息。不過依家搵返,似乎唔見有佢親口宣佈正式掛靴嘅消息。


嚟到2018年,《馬卡報》報導域陀華迪斯喺1月1號,喺Twitter上面發出告別帖文,話多謝足球帶俾佢嘅一切。然後,佢就將自己Twitter帳號刪除咗,Instagram帳號亦都轉為private兼刪除晒所有相片。《馬卡報》話,原來VV早喺2015年已經話過會咁做:「當一切完結嘅時候,我會同我嘅小朋友一齊,教佢哋關於人生嘅嘢。我希望喺嗰個時候,大家好難再搵到我。」


相信VV咁樣做,係因為想退役後多啲時間陪伴家人,放低球星嘅身份,唔想俾外界打擾佢同家人嘅生活,希望佢一家都幸福快樂啦!

loading
loading

loading

Source: MarcaSportbibleESPN

留言


請按此登錄後留言。未成為會員? 立即註冊
    快捷鍵:←
    快捷鍵:→