準到離晒譜！馬高斯阿朗素用腳打籃球，超遠距離直射穿針

車路士上季喺干地執教之下，以343陣式勇奪英超冠軍，佢哋打得咁好嘅關鍵之一，就係一對翼衛——馬高斯阿朗素同域陀摩西斯不知疲倦咁助攻助守。由費倫天拿加盟嘅西班牙左翼衛馬高斯阿朗素，更加擅長處理死球，最近一場英超比賽，車路士就係憑佢嘅罰球一箭定江山，擊敗修咸頓。


喺第18輪英超比賽，車路士主場對修咸頓久攻不下，全靠馬高斯阿朗素喺上半場補時階段，喺大約30碼左右位置主射罰球，直射貼柱邊入網，以1-0小勝。

https://i.imgur.com/Yl6f3Sw.gif
佢嘅罰球技術係有目共睹，但原來係可以用嚟射籃！最近車路士官方Instagram上載咗一條片，佢哋將一個籃球架放喺訓練場上面，然後叫阿朗素喺一個幾遠嘅距離，試下直接射入籃。


驟眼睇，阿朗素同籃框嘅距離點都遠過三分線，就算打開籃球嘅普通人用手射都未必咁準。不過阿朗素用佢隻左腳一射，個波就以完美嘅拋物線「穿針」入籃，真係好勁！


Source: DailyMail