夏薩特對紐卡素一仗，chip射十二碼原來有特別意義？ 精選

喺星期六嘅英超比賽入面，車路士以3-1擊敗賓尼迪斯帶領嘅紐卡素，其中車路士球星夏薩特為主隊射入12碼「埋齋」，以夏薩特嘅球技，採用「chip射」呢種藝高人膽大嘅處理方式，本來就冇乜特別，但原來呢次用咁嘅方式處理12碼，可能係另有深意。

12月2日上演第15輪英超賽事，車路士主場迎戰紐卡素。紐卡素喺初段由杜韋加爾先開紀錄，但車路士隨後憑夏薩特同莫拉達入波，喺上半場反超2-1。74分鐘，摩西斯喺禁區被馬特列治剷趺，車路士獲得12碼機會，夏薩特「chip射」建功，同時射入咗個人對紐卡素嘅第6個入波。
https://i.imgur.com/9yXtCUz.gif

不過，呢一球嘅意義遠非於此，事關呢一日係12月2號。即係咩日子呢？呢一個「chip射」12碼方式叫做 Paneneka，係以捷克名將柏倫卡 (Antonín Panenka) 命名 ，而呢一日就正係柏倫卡69歲生日！


話說喺1976年歐國盃，當時嘅捷克斯洛伐克 (Czechoslovakia) 沿路殺退強敵蘇聯同荷蘭，入到決賽對住碧根鮑華領軍嘅西德，如果踢完加時120分鐘仍然打和2-2。喺互射12碼階段，捷克斯洛伐克就頭四輪全數射入，而西德就喺第四輪射失，只要捷克斯洛伐克喺第五輪射入，就可以捧起歐國盃。

https://i.imgur.com/RfiTx8a.gif(UEFA精華: Czechoslovakia v West Germany: 1976 UEFA European Championship final highlights)


主射嘅柏倫卡，喺歐國盃決賽史上第一次互射12碼分勝負中嘅決定性一球，佢企到出禁區外助跑，正當你以為佢會一嘢轟埋去之際，佢竟然輕輕一chip，呃過西德門將入網。真正嘅藝高人膽大就係呢啲，喺決勝時刻，成為第一個喺大賽用呢個方式射入2碼嘅球員，幫國家歷史性捧起歐國盃獎座，呢個係捷克同斯洛伐克加埋至今為一嘅歐國盃冠軍。

自此之後，呢一種「chip射」12碼就叫做 The Panenka 。夏薩特選擇喺柏倫卡生日當日咁樣入波，係唔係有心就佢自己先知，不過有人就講笑，話如果紐卡素教練團做多啲功課，知道呢日係柏倫卡生日，就可以預知夏薩特一定會chip射喎。

阿仙奴嘅艾朗藍斯，喺今年年中都曾經代表威爾斯，出戰世界盃外圍賽對塞爾維亞時射入Panenka式12碼，呢球特別之處，係藍斯正正係喺當年1976年歐國盃決賽嘅同一個場地、同一個龍門，向柏倫卡致敬。


最後，向柏倫卡致敬嘅，當然唔少得香港世界級射手陳肇麒，佢輕鬆示範Panenka，證明唔係咁易做到，反映出柏倫卡有幾屈機：


https://i.imgur.com/8wB64J0.gif(原片: 20151227 陳肇麒輕鬆射十二碼)

Source: Sportbible