【J-League】川崎前鋒煞科戰壓哨封王，37歲One Club Man圓夢落淚 精選

今屆嘅 J-League 一定好睇過大台劇集同勵志故事，因為今屆聯賽嘅爭冠之路好有戲劇性，本來佔有主動權嘅傳統勁旅鹿島鹿角，喺最後兩場一再失分，令川崎前鋒得以後上封王，拎到球會史上第一個 J-League 冠軍，更係對球會老臣、健力士紀錄保持者中村憲剛嘅最大回報。

(結局冷到連賽會都只係為川崎前鋒準備咗紙牌)

喺香港時間12月2日下午，J-League進行2017球季煞科戰。喺賽季最後兩輪比賽之前，貴為日職史上最成功球會嘅鹿島鹿角 (奪冠8次) 依然以70分排喺榜首，領先次席川崎前鋒4分，去到聯賽尾二場比賽，鹿島鹿角喺主場同柏雷素爾踢成0-0，相反川崎前鋒就成功作客擊敗浦和紅鑽，雙方差距只剩2分。

雖然係咁，但鹿島鹿角明顯仍然佔有主動，只要佢哋順利喺煞科戰贏波，就必定可以捧盃。另一邊廂，川崎前鋒要奪冠就難得多，自己要贏波之餘，仲要寄望鹿島鹿角再次失分，佢哋最有利嘅條件係擁有+34得失球差，而鹿島鹿角只有+22，喺分數落後兩分之下，呢個絕對係關鍵因素。
煞科日比賽中，川崎前鋒喺主場出擊鬥已宣佈降班嘅大宮松鼠，佢哋不負眾望，憑國腳小林悠嘅帽子戲法，以5-0大炒大宮松鼠；至於鹿島鹿角方面，佢哋作客聯賽第五位嘅磐田山葉，只能同對手互交白卷，0-0和波而回。結果，川崎前鋒成功喺最後一戰追上鹿島鹿角，一樣拎到72分，但喺得失球差方面就以+39對+22大勝，終於一嘗問鼎J-League冠軍寶座嘅滋味！



川崎前鋒一班球員喺完場哨子聲響起之後，得知球隊奇蹟封王，都興奮到喊出嚟，特別係中場指揮官中村憲剛。37歲嘅中村憲剛喺今季內成為咗日職史上第17個上陣400場或以上嘅球員，佢更加唔係一般嘅老將，老將可以間中上場發揮餘熱有貨交已經係一流，但中村喺上一季仲以36歲高齡當選日職MVP，仲因為咁而做埋健力士紀錄保持者。


咁都未算，中村憲剛由2003年出道起就已經效力川崎前鋒，無論高山低谷都始終冇離開過，佢個人最輝煌嘅時候曾經喺2006-2010期間連續五季入選聯賽最佳11人，但球隊同錦標總係「只差一點點」，喺2006、2008同2009年都拎到亞軍，冠軍始終冇拎過。不過佢哋今屆發揮奇佳，除咗中村憲剛喺中場繼續有好表現之外，首席射手小林悠就喺最後一場連中三元，同球隊一齊後上，以23球成為聯賽神射手，力壓22球嘅大阪櫻花前鋒杉本健勇。


作為一個 One Club Man ，捱到37歲，同球隊一齊拎到大家第一個聯賽冠軍，唔好話中村憲剛自己啦，我睇到都想喊呀！



官方精華

https://youtu.be/OaPo84PlVZI
Source: J-League、Soccer King