【傷病潮】對德國賽前共七人退隊!23歲艾歷迪亞將成英軍隊長

睇足365 於 10/11/2017 發表 收藏文章
喺今個星期嘅國際賽期,英格蘭國家隊將會先後同德國、巴西進行友誼賽,不過三獅軍團喺即將迎戰強敵德國隊之前,就有好多不利消息,佢哋由公佈今次入選名單開始,已經有七名國腳因傷退賽,兵源捉襟見肘,同時「有危自有機」,可能係放膽用新人嘅機會。


英格蘭國家隊將會喺香港時間11月11日04:00,喺主場溫布萊迎戰衛冕世界盃冠軍德國,雖然只係友賽,但相信一班英格蘭國腳都唔想喺鄉親父老而前失威。根據《Sky Sports》報導,佢哋喺賽前再有壞消息,原本主帥修夫基選入咗畢特蘭、祖赫特同埋碧福特三位門將,而且打算俾畢特蘭喺即將來臨嘅比賽中正選上陣,點知佢喺最近嘅訓練中受傷,手指骨折,要退隊返去史篤城接受治療。


計埋畢特蘭,由修夫基公佈今次名單開始,已經有七名國腳退隊,其餘六位係哈利簡尼、迪利阿里、哈利雲克斯、史達寧、戴夫同軒達臣,其中哈利簡尼、迪利阿里同軒達臣本身都係修夫基必用之選,佢哋退隊令修夫基好頭痕。

同時,呢個亦係一個放膽用新人嘅好機會,修夫基補選咗積克確克 (Jack Cork) 同利維摩亞 (Jake Livermore) 入伍,加上選入祖高美斯 (Joe Gomez)、羅夫度斯卓克 (Ruben Loftus-Cheek)、譚美阿巴謙 (Tammy Abraham) ,呢啲都係本土新星、國家隊新丁或者係好少有機會入國家隊嘅滄海遺珠,趁一啲主力傷退嘅時候試下佢哋都係好事。


根據《Sky Sports》報導,修夫基除咗會起用新人之外,更加會喺對德國呢場比賽,將隊長臂章交俾年僅23歲嘅熱刺防守中場/中堅 艾歷迪亞。


艾歷迪亞只有22次國家隊上陣經驗,但將會成為修夫基任內第六位隊長,之前由修夫基任命嘅英軍隊長有加利卡希爾、祖赫特、哈利簡尼、軒達臣同朗尼,不過呢幾位做過隊長嘅前輩當中,加利卡希爾同祖赫特其實今次都喺陣中。自從朗尼宣佈退出國家隊之後,修夫基一直冇為英格蘭任命正式嘅隊長,而只係揀咗每場比賽嘅場上隊長,所以因應每場陣容出現咗咁多個唔同嘅隊長,而相信今次對德國嘅比賽中,加利卡希爾同祖赫特都唔會正選上陣,所以艾歷迪亞就會係場上嘅領軍人物。


另一方面,修夫基將會喺今場派出碧福特為正選門將,而且暫時唔會再喺英格蘭集訓營以外補選新人,只會考慮從U21國家隊提升,特別係愛華頓嘅卡華利雲 (Dominic Calvert-Lewin)、李斯特城嘅加雷 (Demarai Gray) 、利物浦嘅蘇蘭基 (Dominic Solanke),修夫基將會喺對巴西之前考慮調入佢哋。
Source: Sky SportsDaily Mail
球員譯名以賽馬會球員名單為參考標準

留言


請按此登錄後留言。未成為會員? 立即註冊
    快捷鍵:←
    快捷鍵:→