學簡東拿?艾夫拿熱身時間怒踢球迷,歐霸史上首人賽前領紅

睇足365 於 03/11/2017 發表 收藏文章
唔知大家最近有冇睇過一段片,講一個球員後備上陣,因為太早行入場區,兼辱罵球證而秒速拎到兩黃一紅被逐。點知喺歐霸嘅比賽入面,喺一位你同我都識嘅球員身上,就發生咗一件有過之而無不及嘅事件。

香港時間11月3日清晨,歐霸盃分組賽 I 組比賽,葡超球隊甘馬雷斯對法甲球隊馬賽。效力馬賽嘅前曼聯後衛艾夫拿 (Patrice Evra) ,喺賽前熱身時間,同與場邊嘅球迷發生衝突,更起飛腳踢向球迷頭部,結果被球證直接出示紅牌趕出場。

loading


喺比賽之前嘅熱身時段,有一班懷疑係馬賽球迷嘅人走到落去廣告牌旁邊,傳聞有人不滿艾夫拿近期嘅表現,同艾夫拿發生口角,而被激嬲嘅艾夫拿喺衝突中,起飛腳踢向一名球迷嘅頭部,目睹事件嘅球證於是驅逐艾夫拿離場,令佢成為咗歐霸盃由2009-10球季成立以來,第一個於賽前領到紅牌嘅球員。

loading


由於艾夫拿並唔喺今場比賽嘅正選十一人名單之中,所以佢被逐冇影響馬賽嘅開賽部署,但都令馬賽嘅後備席只有六人可供調動。


暫時仍未有消息透露,究竟球迷同艾夫拿講咗啲咩,令到佢咁嬲。事後,好多球迷都話,睇咗艾夫拿咁多年,佢絕對唔似係撩事鬥非嘅人,亦都唔係EQ低到俾人話兩句就郁手嘅人,懷疑嗰位球迷講咗一啲極之過份嘅說話先會咁樣。亦都有球迷將今次事件同艾夫拿喺曼聯同法國嘅前輩簡東拿做比較,講笑咁話佢只係向前輩致敬。
loading

loading
loading

https://youtu.be/JFsW6vvBwHk

馬賽主帥魯迪加西亞事後就批評嗰位球迷:「佢唔係我哋馬賽嘅球迷,因為馬賽球迷唔應該侮辱我哋自己人,無論點都應該支持我哋嘅球員。」

但佢當然唔能夠支持艾夫拿郁手嘅舉動:「艾夫拿係一個經驗豐富嘅球員,佢無論如何都唔應該有咁嘅反應,呢樣嘢係十分明顯嘅。」

馬賽會方亦發表聲明,表示將會對今次事件展開調查。另外,36歲嘅前法國國家隊隊長,估計可能仲會面臨歐洲足協嘅秋後算賬。

Source: Guardian TelegraphGoal
標籤: 艾夫拿  歐霸  馬賽  曼聯  簡東拿  

留言


請按此登錄後留言。未成為會員? 立即註冊
    快捷鍵:←
    快捷鍵:→