美斯比賽中公然啪藥，到底搞邊科？

喺啱啱嘅歐聯分組賽，巴塞隆拿主場以3-1擊敗希臘球隊奧林比亞高斯，而巴塞球星美斯更加喺下半場射入靚罰球，攻入個人第100個歐洲賽入球！不過佢仲有另一樣嘢吸引到大家嘅焦點，就係佢竟然喺比賽中途，公然「啪藥」，成為熱話，到底點解呢？

https://youtu.be/bT33l3m-01w
呢場喺魯營球場嘅比賽中，開波大約9分鐘多啲，球王美斯冇啦啦喺對波襪個摺位入面，拎咗粒藍色藥丸出嚟，當住鏡頭面前啪咗落肚。


美斯喺呢場比賽中表現十分出色，佢除咗自己射入個人第100個歐洲球會賽事入球之外，仲助攻俾迪治尼射入3-0嗰球，帶領10人應戰嘅巴塞以3-1擊敗奧林比亞高斯，於是有人就問，美斯係咪靠食禁藥提升表現？

根據加泰隆尼亞電台《Catalunya Ràdio》報導，指出嗰粒藍色藥丸其實係一粒普通嘅葡萄糖，係用嚟補充能量嘅，又話呢個情況喺運動員中係十分普遍。相信係因為美斯間中會喺比賽中嘔吐，所以佢準備定藥丸嚟預防呢個情況。
《馬卡報》又引述指，呢種藥丸最好應該係喺熱身後至到開賽之前食嘅，但就唔知美斯點解要收埋粒丸到比賽第10分鐘先食喇。

《ESPN》引述巴塞主帥華維迪話：「我唔知佢係咪食葡萄糖丸，但如果佢因為食咗粒藥而入波嘅話，咁佢應該大包大包咁啪……不過我知道唔少球員都有食葡萄糖丸嘅。」

Barcelona vs Olympiakos 3-1
https://youtu.be/MwC256aBLEE
Source: ESPN、TheSun、Marca