【迪世三】迪布尼有幾勁?再獻世界級靚助攻,最佳創造型中場當之無愧

睇足365 於 18/10/2017 發表 收藏文章
今季曼城好似食咗火藥咁,攻力十分強勁,佢哋喺今季英超8場比賽,瘋狂地攻入咗29球。曼城入咁多波,除咗因為鋒線有新星加比爾捷西斯 fit 到爆之外,中場嘅供應亦都功不可沒,講緊嘅就係奇雲迪布尼同大華施華。佢哋啱啱又喺歐聯分組賽以2-1殺退意甲勁旅拿坡里,迪布尼繼周末英超之後,再獻靚助攻。


上一次有英格蘭頂級聯賽球隊喺開季頭8場射入多過29球,已經要數到1894-95球季,當時嘅愛華頓8場入咗30球,百幾年前嘅事,咁你就知曼城有幾誇張。個人認為,曼城開季至今最得人驚嘅球員一定係迪布尼。

26歲嘅迪布尼當年喺車路士被摩連奴棄用,輾轉踼過德甲嘅禾夫斯堡,再返到嚟英超證明自己實力,踏入喺曼城嘅第3個球季,佢嘅表現似乎更上一層樓,除咗之前對舊主車路士時左腳轟入世界波,仲瀕瀕有超靚助攻,令人開始諗,佢係咪已經屬於「世三級」球員 (網友稱僅次於C朗、美斯嘅超級球員為世界第三,如「夏世三」) ,或者至少稱得上係世界最佳嘅創造型中場之一。
https://i.imgur.com/jKlqLqT.gif
https://youtu.be/8Oxajl0cj4c

喺啱啱嗰場歐聯分組賽,曼城主場對拿坡里,迪布尼再次交出超靚助攻,上半場12分鐘,佢喺禁區外拎波,爆落右路,割草式地面傳中俾遠柱嘅加比爾捷西斯輕鬆射入,射成2-0。唔少網友睇完之後都O晒嘴,唔明點解佢咁樣都可以穿過兩個人加門將,傳到去「耶穌仔」腳下。

https://i.imgur.com/IbuCcll.gif
不過,個人認為佢上一場英超對史篤城嗰陣有一球仲誇張,當時佢喺中場搶咗個波,喺對手力逼之下,右路45度地波斜線傳中,個波兜過咗三個人去到「耶穌仔」入楔嘅位置,後者單對單輕鬆射入,計數都冇咁準!

https://i.imgur.com/7SGyJ3Z.gif

之後仲有一球劏穿晒,交俾辛尼射入。

https://i.imgur.com/uCJiceG.gif

睇返佢今季喺每場比賽嘅走動接應、傳送、盤扭,你會覺得佢已經比場上所有人高一班波,而且有唔少靚波都係喺高速攻守轉換之中交出,難度一啲都唔低。事實上,佢今季暫時喺英超累積5個助攻,僅次於隊友大華施華嘅6個助攻,排喺聯賽第2位,至於關鍵傳球 (Key Passes) 就有場均3.3次,係聯賽第一。


喺上一場英超之後,《Daily Mail》就列出咗一項數據:迪布尼首次為曼城上陣以來,直到上一輪英超比賽,歐洲五大聯賽中冇任何球員嘅助攻數字多過佢,包括巴塞嘅蘇亞雷斯、美斯、熱刺嘅艾歷臣,同埋以傳靚波聞名嘅奧斯爾。咁樣仲唔係世界級?


迪布尼今季精彩表現:

https://youtu.be/ZbLl7pR11U8

留言


請按此登錄後留言。未成為會員? 立即註冊
  • alanlauhk 於 18/10/2017 評論 NO. 1

    唔瞓真係著哂

  • saltfish 於 18/10/2017 評論 NO. 2

    !!!!!

  • ekee 於 19/10/2017 評論 NO. 3

    心理質素 同 應付壓力 仲爭d

快捷鍵:←
快捷鍵:→