2018世界盃南美洲區外圍賽最後一輪打到難分難隔，上屆世界盃亞軍阿根廷喺今場嘅生死戰，靠美斯帽子戲法贏厄瓜多爾，先至上返第3位直接出線，至於有阿仙奴球星山齊士壓陣嘅智利就冇咁好彩，佢哋今場以0-3不敵一早就出咗線嘅巴西，以得失球差被同分嘅秘魯壓過，排第6位出局，除咗怪自己唔爭氣之外，亦都要黑過墨斗先至落得出局嘅下場。
喺今場波之前，智利仲排緊喺前4入面，有機會直接出線，可惜佢哋唔爭氣，淨輸3球咁多，其實只要佢哋輸1-2，都可以同秘魯同分兼得失球一樣，計總入球數拎返個第5位踢附加賽。不過，有另一個情況十分巧合，就係假如喺啱啱哥倫比亞對秘魯呢場波入面，哥倫比亞國門、阿仙奴門將奧斯賓拿冇撲入到秘魯嗰球罰球，秘魯就會輸0-1，拎唔到第5位。
睇返球罰球，荷西古里路 (Jose Paolo Guerrero) 射得都幾靚，點解要怪奧斯賓拿呢？原來球證指示呢一球係間接自由球 (indirect free kick)，即係話主罰球員唔可以直接將個波射入網，否則入咗都唔計，除非中途有另一位球員掂過個波啦。
https://streamable.com/wg4q9
排人牆嘅哥倫比亞中場占士洛迪古斯都有機會「hi」到個波嘅，但睇返慢鏡就應該冇掂到，即係話只要奧斯賓拿掂唔到個波，入咗都唔計。點知好衰唔衰，奧斯賓拿根本冇留意呢球係間接自由球，飛到盡撲落去，又撲唔返出嚟，結果「幫」咗秘魯追平1-1。事後，古達度向球證投訴話呢球係間接自由球，球證就指住奧斯賓拿，示意後者掂到個波。
當然，哥倫比亞和波一樣出線，呢個失誤都無傷大雅，但奧斯賓拿嘅阿仙奴隊友「山神」就陰公喇，如果唔係秘魯喺最後15分鐘入咗呢球，秘魯好大機會輸俾哥倫比亞，而智利就算輸多10球俾巴西都一樣可以踼附加賽，真係俾「豬隊友」玩死。
Brazil vs Chile 3-0
https://www.youtube.com/watch?v=VCquivWmkzw
Source: Mirror、DailyMail
請按此登錄後留言。未成為會員? 立即註冊