英軍風流波唯一亮點：新仔雲克斯獲評MVP

英格蘭國家隊啱啱喺2018世界盃歐洲區外圍賽以1-0小勝立陶宛，只係哈利卡尼一球12碼，不過唔緊要，事關呢場只係「風流波」，英格蘭踢完上一場已經提早鎖定決賽周席位，今場波試陣味甚濃。主帥修夫基除咗擺出3中堅陣式之外，亦派出雲克斯、基士維、麥佳亞等部份副選，除基士維係第3次為大國腳上陣之外，另外兩人都係英軍新兵。

修夫基今仗擺出英超流行嘅3-4-3陣式，係英軍11年來首次喺正式國際賽以3中堅陣式正選上場，修夫基喺賽前對傳媒表示係希望球隊嘅防守更加緊密，準備面對喺2018世界盃遇到嘅更強對手，又話「我哋嘅傳球需要做得更好，我哋需要保持控球，我哋嘅連結喺呢個系統之下做得更好。喺之前嘅比賽，我哋一失咗球權，後面就會空晒俾人打反擊，希望呢個陣式可以改善到問題。」
結果英格蘭的確控制咗比賽，控球率達到70.5%，傳球成功率89%，雖然對手實力唔強，而英格蘭都只係靠12碼以1-0僅勝，但「風流波」最緊要都係睇辦，呢場波獲得一致評為MVP嘅，就係首次為大國腳上陣嘅熱刺小將哈利雲克斯。

21歲嘅雲克斯係熱刺青訓出品，打中場嘅佢屬於墮後派牌類嘅球員，喺熱刺中場競爭激烈之下，雖然都得到一啲機會，但今季暫時都只係錄得121分鐘上陣時間，難怪當初入選大國腳時，曼聯名宿傑斯曾經話修夫基只係因為喺呢個位置上需要一個有創造力嘅中場，而冇乜合適人選，先至揀佢。


不過，雲克斯嘅表現結果令人眼前一亮，賽後獲一致選為評分最高嘅球員。第一次代表國家正選上陣，開頭係有啲緊張，之後越踢越有信心，喺老大哥軒達臣身邊梳理中場，成功連結三獅嘅後場同前場，仲差啲有波入添。


佢喺今場比賽錄得全隊最高嘅95.9%傳球成功率，不斷現位拎波分波，定過抬油，不論喺《Daily Mail》、《BBC》、《WhoScored》都錄得全隊最高評分。
Daily Mail:

BBC:

WhoScored:

不過，作為新人，雲克斯嘅地標戰雖然相當對辦，但當然唔可能話係完美。無論係佢個人，或者係英軍整體嚟講，都係唔夠進取，比較少向前嘅傳送，而英軍今場波唔能夠取得一個「生波」嘅入球，正正反映咗創造力不足同埋太保守嘅問題，所以傑斯喺賽後繼續批評話，佢自己踼中場嘅時候永遠都係諗點樣令個波向前，但「呢個係唔係英格蘭中場線諗嘅嘢呢？定係佢哋只係諗緊『我唔可以傳失個波』呢？」


雲克斯今場嘅實際表現係點樣呢？不如睇睇片啦：

https://youtu.be/MhvqbRjrUIE
Source: Daily Mail、BBC、WhoScored、Givemesport