《Sky Sports》:北京國安報價購丹比利獲熱刺接受,同時接近簽下前阿仙奴青訓學徒

睇足365 於 09/01/2019 發表 收藏文章
廣州恆大喺中超嘅壟斷終於被上海上港打破,其他中超球會亦雄心壯志急起直追,希望成為下一支中超冠軍。根據《Sky Sports》報導,首都球隊北京國安 (北京中赫國安) 最近於轉會市場上取得重大進展,有機會簽下兩名於英格蘭聯賽效力嘅球員。


《Sky Sports》報導,中超球會北京國安最近正積極部署簽下熱刺中場丹比利 (Mousa Dembele) ,更已正式向熱刺提出900萬英鎊報價,並獲得接受。換言之,只要丹比利同北京國安就個人條件達成共識,交易就可以成功。


31歲嘅比利時中場丹比利效力熱刺已經接近7年,各項賽事249次,一直係熱刺中場重要一員,不過近年間中受到傷患困擾,今季因腳踝受傷,已經由11月倦勤至今。丹比利嘅合約將會喺今年夏天結束,因此佢現時已經可以自由同國外球會談判季尾轉會事宜,同時熱刺亦可以喺一月轉會窗內將佢放售。

除咗丹比利之外,北京國安亦已相中另一位於英格蘭聯賽發展嘅球員,但呢位球員嘅來投意義將會更加深遠。前阿仙奴青訓學徒恩拿利斯 (Nico Yennaris) 傳聞將會登錄中超賽場,已經係舊聞一則,最近得到《Sky Sports》確認,恩拿利斯轉會北京國安進展十分順利。


25歲嘅恩拿利斯出道於阿仙奴青年軍,亦曾經為槍手一隊上陣4次,當年已經因為外貌有貌似華人而被留意。恩拿利斯於2014年1月正式轉會到賓福特,主要司職防守中場或右閘,協助球隊由英乙升上英冠,至今仍然係球隊主力。由於恩拿利斯父親為英籍塞浦路斯裔,母親擁有中國血統,祖父為中國人,令恩拿利斯同時擁有代表英格蘭、塞浦路斯及中國嘅資格,佢喺青年軍時期代表英格蘭U19上陣7次。


北京國安總經理李明早前曾經表示,恩拿利斯及來自挪威嘅侯永永 (John Hou Sæter) 都將會入籍中國,成為「歸化兵」,畎此令球隊省下外援名額。可以預計,今次兩位「歸化兵」登陸中超之後,不久就有可能代表中國國家隊上陣。

Source: Sky SportsSky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→