【 High爆腰斬】C朗按祖記傳統小鎮演地標戰　八分鐘射入加盟第一球

C朗拿度今夏以1億歐元轉會費加盟意甲班霸祖雲達斯，令大批球迷將焦點放到意甲身上，佢第一次穿起黑白間條球衣上陣，當然係萬眾期待。不過，C朗第一場代表祖雲達斯上陣嘅表比賽，按傳統被安排喺一個人口只得約4,000人嘅小鎮舉行，令小鎮被蜂擁而至嘅球迷逼爆。


小鎮佩路沙 (Villar Perosa) 位於都靈郊區，係祖雲達斯主席阿涅利 (Agnelli) 嘅老家所在，所以祖記選擇喺呢度踢今季第一場。呢場比賽雖然只係祖雲達斯對祖雲達斯B隊嘅熱身賽，但呢個戲碼作為球隊每季第一場比賽嘅傳統，已經維持87年咁耐，加上有C朗亮相，令唔少球迷湧入呢個小鎮睇波，據報導有超過5,000名球迷到場，超過小鎮人口，而且喺當日上午已經有長長車龍排隊入鎮，準備黃昏時間睇波。


開波僅僅8分鐘，正選上陣嘅C朗接應長傳，單刀冷靜抽入，射入加盟班馬軍團首個入球。

https://i.imgur.com/G6P31Ee.gif

上半場大勝4-0之後，C朗就退下火線。按照傳統，球迷會喺下半場會衝入球場，將場上球員嘅所有衫褲除晒 (只留內褲) ，而比賽亦會提早終止。今場波球迷超興奮，大約70分鐘衝晒入球場，新加盟嘅安利簡同「回家」嘅邦路斯，同樣被剝光豬，仲要著住底褲留喺場上幫球迷簽名。至於C朗，就似乎「逃過一劫」。
https://youtu.be/ncoG4_8bz5w
Source: repubblica.it