《FourFourTwo》選出「FIFA20」11大未來自由身球員,頂級攻中艾歷臣萬勿錯過!

睇足365 於 01/10/2019 發表 收藏文章
足球電子遊戲《FIFA 20》嘅「Career mode」生涯模式,玩家可以扮演領隊。講求真實模擬嘅《Football Manager》入面,中小型球會儲轉會資金有難度,二來即使有足夠金錢,亦要面對賣方抬價、球員本人冇興趣、合約條件等問題,而星級自由球員嘅薪金更加會遠超你薪酬預算,真係學現實中咁用布雷西亞免簽「巴神」應該就好難做到喇;喺《FIFA》生涯模式入面,就相對容易儲夠大額轉會資金,而有錢就好大機會成功簽入大牌球星,自由球員難度更低,價高者得,少好多麻煩 (玩過FM就明),所以有玩生涯模式嘅你就絕對要留意有咩球星將會喺2020年夏天完約,趁早喺2020年1月嘗試將佢簽下。

足球雜誌《FourFourTwo》就喺網上發表一篇文章 "FIFA 20 career mode free agents: 11 unmissable players with expiring contracts" ,介紹11個絕對不能錯過嘅自由球員,等小弟將佢用中文寫返出嚟 (附主觀評價) ,介紹俾大家!

迪基亞 (門將)
潛在薪金: £170,000
推介指數:***
冇錯,迪基亞喺現實中已經同曼聯續咗約,不過有時遊戲中就冇跟到咁足,事關曼聯公布迪基亞續約之前,隻game已經完成咗佢推出前嘅數據庫更新,因此遊戲中佢將會喺2020年夏天成為自由身。

玩家可以嘗試喺遊戲第1季1月轉會窗向佢開出合約,作者測試過佢薪金要求大約係17萬英鎊周薪。當然,如果你係用細球會,可能要賣人籌錢先出得起,咁就要諗諗以下邊一個最值得喇。


基羅拿華斯 (門將)
潛在薪金: £130,000
推介指數:***

一個好龍門喺遊戲中可以救你全家,所以呢個list入面就出現咗第二位門將。現實中,基羅拿華斯喺轉會窗最後一日已經由皇馬轉投PSG,不過《FIFA》一樣冇改返,所以佢又係會喺2020年成為自由身。

拿華斯嘅綜合能力值高達87,雖然不及90嘅迪基亞,而且已經33歲,但人工比較平,一分錢一分貨啦。



沙治奧拉莫斯 (中堅)
潛在薪金: £190,000
推介指數:**

沙治奧拉莫斯不時受到批評,佢喺啱啱過去嘅轉會窗亦有傳聞將會離隊,不過就冇發生到,而佢亦進入合約最後一年。

花19萬鎊周薪去簽一位33歲中堅,的確係太奢侈,但佢喺遊戲中絕對係一位頂級中堅,綜合能力值高達88,如果你用曼聯,清晒啲高薪冗員、N大中堅,去簽佢改善防線,都諗得過嘅。


基亞連尼 (中堅)
潛在薪金: £170,000
推介指數:*

綜合能力值同樣88嘅基亞連尼,立定攔截同滑剷能力有91同90,猶如銅牆鐵壁,不過已經35歲,人工都唔平,相信冇乜人對佢有興趣。


華湯根 (中堅)
潛在薪金: £120,000
推介指數:****

熱刺中堅孖寶華湯根同艾達韋列特同樣接近合約期滿,不過艾達韋列特就多好多人爭,所以華湯根係比較容易簽嘅一個,佢人工要求相對低,而且能力值都夠用,連埋上面三個中堅三揀一會揀佢。


阿歷斯辛度 (左閘)
潛在薪金: £135,000
推介指數:*****

呢個list入面唯一一位閘位球員,呢位巴西左閘喺遊戲中一直係一位世界級左閘,攻守全能,當打之齡,價廉物美, "shut up and take my money" 。


費蘭甸奴 (防中)
潛在薪金: £200,000
推介指數:*

過去幾年曼城中場嘅基石之一,綜合能力值86,不過已經34歲兼且叫價太高,不了。


摩迪 (中場中)
潛在薪金: £300,000
推介指數:*

摩迪貴為金球獎得主,絕對係一位中場大師,佢嘅短傳 (92) 、長傳 (88)、盤球 (87) 數值全部都係世界頂級,足夠撐起成隊波,難怪即使34歲仍然叫價30萬鎊周薪。可能你鍾意儲球星,或者想用巴塞簽佢返嚟擺,有錢就是任性,請隨便。


艾歷臣 (進攻中場)
潛在薪金: £180,000
推介指數:*****

上面幾位人兄都一把年紀,艾歷臣就唔同喇,仲係當fit之年,而且人工唔貴,能力值89嘅免簽當打攻中,喺邊度搵?


大衛施華 (進攻中場)
潛在薪金: £190,000
推介指數:***

大衛施華已經講明今季之後離開曼城,現實中佢有可能去美職加入碧咸隊波,遊戲中你就可以搶佢過嚟,同樣年紀唔細,但人工平過上面幾位老將。


卡雲尼 (前鋒)
潛在薪金: £180,000
推介指數:*****

好前鋒難尋,如果你想喺遊戲中搵一位免簽神鋒,卡雲尼一定係不二之選,佢嘅能力值有87,更加唔會好似現實中咁浪費機會,因為個手掣係喺你手上。



以上推介指數純屬本人綜合人工、年齡、位置、能力值嘅超主觀評價,打機就係有曼聯球迷簽朗尼返嚟退休、阿仙奴球迷栽培贊堅遜之類嘅非理性選擇先有趣,自己鍾意就好,如果你玩PSG,簽晒佢踢一年衝擊歐聯囉!

Source: FFT

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→