C朗談美斯:我諗佢掛住我多啲,佢應該好似我咁離開comfort zone過嚟意甲

睇足365 於 11/12/2018 發表 收藏文章
要數當今球壇一時瑜亮,必定係C朗拿度同美斯,兩人曾經長期分別效力死對頭皇家馬德里及巴塞隆拿,又齊齊壟斷金球獎長達10年,各項數據上爭個你死我活,如果問邊個更強,大概會引起世界大戰。兩人球迷勢不兩立,但當事人又未必視對方為敵人,低調嘅美斯好少提起C朗,不過就曾經話過兩人雖然唔係朋友,但都唔係敵人,至於高調嘅C朗亦曾經喺言談間暗讚美斯,例如話當今球壇可以喺10年間維持極高水平嘅人,只有自己同美斯。


今季,C朗以1億歐元離開熟悉嘅西班牙,首次踏足意大利球壇,祖雲達斯喺意甲一枝獨秀,失去勁敵嘅C朗難免覺得寂寞,佢近日接受訪問時就直言,認為美斯應該嚟意大利踢波:「我會希望佢有一日嚟意大利踢波,希望佢好似我咁接受呢個挑戰,不過如果佢喺巴塞仲好開心,我都會尊重。」


被問到係唔係掛住美斯,C朗就話:「唔係,可能佢先係掛住我嗰個。我喺英格蘭、西班牙、意大利、葡萄牙同國家隊都踢過波,佢仲留喺西班牙。可能佢需要我多啲。對我嚟講,生活就係挑戰,我鍾意咁樣,亦都鍾意令人開心。佢係一個極好嘅球員,同一個好人,不過我唔會掛念西班牙嘅任何嘢。呢度就係我嘅新生活,我喺呢度過得好開心。」


「我離開咗我嘅舒適圈,嚟到都靈接受挑戰,所有嘢都進行得好理想,我喺度證明咗自己仍然係一個難以匹敵嘅球員。」

美斯自細已經加入巴塞隆拿青訓並效力至今,如今已經31歲,要佢離開巴塞絕對唔係容易嘅事,但如果佢去意甲,踢邊隊好呢?

Source: Sky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→