C朗登陸意甲:通常呢個年紀係去卡塔爾或中超,我要離開comfort zone

睇足365 於 17/07/2018 發表 收藏文章
葡萄牙球星C朗拿度離開效力長達9年嘅皇家馬德里,以1億歐元轉會費加盟意甲班霸祖雲達斯,最近正式於新球會亮相。

C朗雖然係世界最佳之一,但以33歲之齡,高價登陸意甲,亦令唔少球迷感到意外,所以佢喺亮相儀式嘅記者會上,花咗唔少時間去解釋呢個決定。



「喺皇馬嘅9年好美妙,呢個係我人生嘅新階段,所以我要衷心感謝球迷嘅支持。不過我而家要專注前路,我好期待踢比賽,非常有動力、非常專注喺呢方面。

我會好似平時一樣,證明我係一個頂級球員。我會努力訓練……我熱愛挑戰,唔希望留喺comfort zone入面。有過喺曼聯同皇馬嘅經驗,我希望可以喺祖雲達斯歷史上留名。

通常球員去到我呢個年紀,會去卡塔爾或者中國,我咁講並唔係唔尊重,而係話我喺呢個年紀仲可以嚟到一間咁出色嘅球會,令我非常高興,所以我好感謝祖雲達斯俾呢個機會我。」



C朗又話,「斑馬軍團」喺意甲十分成功,去到歐聯亦有力殺入決賽,佢希望自己可以帶領球隊去到更高嘅高度。祖雲達斯高價羅致C朗,除咗品牌效應之外,當然係希望衝擊歐聯冠軍,而C朗喺皇馬贏盡一切,如果能夠帶領祖記拎到歐聯,亦係一大成就,來季歐聯拭目以待!


Source: Guardian BBC

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→