BBC於2015年預測英軍2020歐國盃陣容被「鞭屍」,當年球迷:哈哈,點會冇菲爾鍾斯!

睇足365 於 12/02/2020 發表 收藏文章
球員嘅發展受到制遇、戰術潮流、教練、隊友、運氣、傷病、性格、努力、天分等眾多方面影響,所以基本上每次有人嘗試預測球員三五七年後嘅發展,事後睇返都會覺得好大出入,權威英國媒體《BBC》2015年曾經預測英格蘭國家隊2020歐國盃主力11人陣容,僅僅5年已經彷彿進入平行時空。


事先聲明,對於敢於作出預測,個人而言係相當尊敬,因為預測好多時候都會同現實有出入,好多時候都會被事後取笑。如果每個人都害怕提出獨特嘅意見,咁每人發表嘅評論都係大同小異,甚至都係模稜兩可嘅廢話,就完全冇意思,所以有勇氣去提出一啲特別嘅意見係非常值得尊重,呢啲預測亦對引發思考、創意及討論相當重要。事實上,要預測國家隊多年後嘅陣容更係難上加難,因為所需要嘅其實唔止係預測11名球員嘅發展,而係要考慮整個潛在名單。


《BBC》就不時喺網上提出問題,呼籲網民加入討論。喺2015年3月,當時有一場英格蘭U21對德國U21友誼賽,當時英格蘭U21陣中就有史東斯、禾特包斯、列蒙、連加特、丹尼恩斯等現役英超球員,主教練更係後來成為大國腳主帥嘅修夫基。《BBC》拋磚引玉,提出一個2020歐國盃11人名單,引起討論。

《BBC》成功預測到哈利簡尼、史達寧及軒達臣如今成為英軍主力。其實回想當年,哈利簡尼2015年先首次上演大國腳首戰,把握力極差嘅史達寧尚未遇上哥迪奧拿,軒達臣都係去到近一兩年先開始得到廣泛讚賞,講中佢哋已經唔錯。史東斯都算係英軍必定會選嘅中堅,但筆者就對佢近年發展頗為失望。巴克利經常入選名單,上陣機會就屬於一半半;艾歷迪亞卻已經成為邊緣人。


可惜嘅係,前修咸頓兩閘梳爾及佳尼都係被傷患耽誤發展,而即使放喺當年,寫上韋舒亞嘅名字都係一個大膽選擇,因為佢當年已經係傷多過踢。門將祖赫特喺當年確係必然之選,冇人可以估到如日中天嘅佢,5季取得4次金手套,近年卻一落千丈,淪為棄將,甚至喺般尼都冇得踢,祖赫特係英格蘭首席門將一個當年咁正路嘅預測,都可以相差咁遠,足以反映預測真係唔容易,就算哈利簡尼 2014-15球季橫空出世,當年又有邊個可以保證佢唔係一季貨仔?


講到最具爭議嘅選擇,一定係翼鋒列蒙,當時佢正效力「升降機」諾域治,個人表現唔錯,但呢個選擇都顯然令人大跌眼鏡。佢現時效力修咸頓,仍然係一位英超中游實力嘅翼鋒,只喺2017年為大國腳上陣一次,最近都有入選過大名單,但未獲得出場機會。

被「鞭屍」嘅唔止《BBC》嘅選擇,當時網民嘅反應係更加有趣,有人提出安祖卡路爾、張伯倫、菲爾鍾斯、連加特、比拉軒奴 (現已轉籍代表布隆迪),甚至係佐敦伊比應該入選,其中張伯倫呼聲極高,有人對於軒達臣入選感到震驚,又有人恥笑居然唔揀菲爾鍾斯。





英格蘭對上三場國際賽陣容:

Source: SportbibleBBC

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→