All Go Inter啦X!國米盡收英超兵器,曼車熱兵齊集爭冠?

睇足365 於 17/01/2020 發表 收藏文章
意甲班霸祖雲達斯過去連續8季奪得聯賽冠軍,近年曾經有拿玻里力圖打破壟斷但功虧一簣,「一鼓作氣,再而衰,三而竭」,元氣大傷嘅拿玻里正面臨星散危機,不過另一支傳統勁旅國際米蘭卻適時冒起,正與祖雲達斯鬥得難分難解,國米於1月轉會窗十分積極,力圖一舉功成挑戰意甲冠軍寶座。


國際米蘭曾經於2005-06球季至2009-10球季連奪5屆意甲冠軍,但自從祖雲達斯於「電話門事件」後再次站穩陣腳取得2011-12意甲冠軍之後,國米就經歷一段低潮期,一度跌落第9位,近8季未曾以三甲完成,不過近年開始好轉,近4季有3季以第4名完成。今年正是國米展現野心一年,佢哋邀請到曾經執教意大利國家隊及祖雲達斯嘅名帥干地,球隊煥然一新。



國米於夏天轉會窗已經花費約1.6億歐元引援,其中包括兩名喺曼聯過得不盡如意嘅攻擊球員——盧卡古及山齊士。盧卡古加盟後完全脫胎換骨,聯賽19次上陣貢獻14個入球及2個助攻,絕對係干地最值得倚重嘅前鋒。至於由紅魔外借加盟嘅山齊士就延續厄運,加盟後只踢過198分鐘,其餘時間都係養傷居多,最近先復出,以國米最近增兵嘅情況睇,佢喺國米嘅前景都唔太樂觀。


除咗盧卡古及山齊士,國米即將迎來第三位(前)曼聯球員,佢係曼聯隊長艾殊利楊格。雖然仲未官方宣布,但根據《BBC》及《Sky Sports》證實,艾殊利楊格渴望加盟國際米蘭,而兩間球會亦已達成協議,國米將支付150萬歐元轉會費收購呢名34歲老將,只待球員於星期五完成體測及簽約同意個人條款。《BBC》補充指,合約內包含附加條款,如艾殊利楊格協助國米奪得今季意甲冠軍,曼聯將得到額外回報。



另一方面,多個可靠消息表示,國米收購車路士前鋒基奧特及熱刺中場艾歷臣嘅談判已經進入最後階段,大有機會於短期內完成,成事指數極高。

《Sky Sports》報導指,國米體育總監Piero Ausilio早前到倫敦處理兩位球員嘅轉會談判,佢離開時對記者表示充滿信心。報導又稱,基奧特及艾歷臣嘅個人條款預計不成問題,只差轉會費問題。國米向車路士報價400萬加100萬歐元附加條款,而車路士就要求加至500萬加100萬歐元附加條款。艾歷臣方面,《Sky Sports》指國米報價850萬鎊,但熱刺要求雙倍價錢,但1700萬鎊對國米嚟講應該不成問題。



如果轉會完成,國米將會擁有三名前曼聯球員、一名前車路士球員及一名前熱刺球員,雖然楊格及基奧特年事已高,但都有力為國米增強既有陣容,艾歷臣更係歐洲其中一位頂級進攻中場,加上盧卡古狀態大勇,將會對祖雲達斯構成相當大威脅。

Source:
Ashley Young: Manchester United agree fee with Inter Milan
Christian Eriksen and Olivier Giroud: Inter Milan director 'confident' after London talks

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→