AC米蘭「大地震」:加度素及李安納度同日離職,「幕後黑手」疑為前阿仙奴CEO

睇足365 於 29/05/2019 發表 收藏文章
意甲「米蘭雙雄」近年可謂同病相憐,齊齊「家道中落」,但國際米蘭早已重奪歐聯資格,而且根據《BBC》報導,國際米蘭仍然唔滿足於今季驚險取得前四嘅戰績,決定以干地代替史巴列堤領軍,另外更有傳聞指國米將會對現有陣容進行清洗,伊卡迪、佩列錫兩位球星可能會被賣走。另一邊廂,AC米蘭今季1分之差無緣前四,已連續6季未能取得歐聯資格,見到鄰居發奮圖強,AC米蘭都終於要「痛下殺手」。


AC米蘭主帥加度素於2017年11月臨危受命,由U19教練轉任一隊主教練,代替被炒嘅蒙迪拿。加度素作為球會名宿,的確成功以「救火領隊」身份令球隊重新燃起鬥志,而AC米蘭經過多年動盪後,終於喺加度素帶領後穩定返落嚟。

不過,戰術部署、臨場調配等,似乎並非加度素所長,佢執教至今都喺呢兩方面為人詬病,可以話完全冇板斧,因此一直都有佢帥位不穩嘅傳聞。公道講句,加度素接手以嚟,AC米蘭取得40勝22和20負,以一位初次「坐正」兼臨危受命嘅新手主帥嚟講,成績唔失禮,況且AC米蘭喺加度素執教前了無生氣、一盤散沙,到加度素執教後略有隊型,都係有目共睹。然而,社會就係殘酷,加度素係一個稱職嘅「救火領隊」,但唔係可以帶領AC米蘭更上一層樓嘅人,只可以話佢嘅歷史任務已經完成。


意大利時間星期二,AC米蘭官方聲明,主帥加度素同球會達成共識,提前終止合約 (mutual consent) ;同時,AC米蘭已接納體育總監李安納度辭職。意味著AC米蘭不僅換帥,連管理層都出現人事變動,必定會影響來季球會方針及轉會策略。

《Sky Sports》報導表示得到消息,加度素與李安納度雙雙離任,原因係對於球會嘅轉會政策感到不滿,意見不合。李安納度已貴為體育總監,仲有咩人可以制約佢嘅權力?《Sky Sports》表示呢個人只能夠係球會CEO加齊迪斯 (Ivan Gazidis) 。呢位前阿仙奴CEO,於2018年12月正式到AC米蘭履新;僅僅半年,AC米蘭就出現兩個重大人事變動,未免太過巧合。翻查資料,加齊迪斯上任後,AC米蘭嘅主要轉會動作包括引入波蘭前鋒比亞迪克及巴西中場柏基達,其中後者必定涉及同為巴西人嘅李安納度穿針引線,同時AC米蘭於一月提早終止希古恩租借合約,令佢得以被祖雲達斯轉借到車路士。另外,當時曾有報導指加齊迪斯否決於1月引入伊巴謙莫域及法比加斯兩名自由球員,原因係認為二人年紀較大,未能協助提升球隊。總之,AC米蘭球會內,可以令加度素同李安納度走人嘅除咗佢哋自己、班主,都離唔開CEO喇。


Source: Sky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→