AC米蘭將鎖定兩大新援,續追10年復興夢?

睇足365 於 18/01/2021 發表 收藏文章
自從班霸祖雲達斯喺2007-08球季重返意甲再站穩陣腳,自2011-12球季以來已連續取得聯賽九連霸,其他球隊就算再接近意甲冠軍,偏偏「這麼近,那麼遠」,始終無緣打破祖雲達斯壟斷。喺祖雲達斯九連霸之前,上一個意甲冠軍(2010-11)正正係由AC米蘭奪得,紅黑軍團近年一度跌落中游,經過咁多起起跌跌,現時得以佔據意甲榜首,距離上一次奪冠剛好10季,可唔可以再次問鼎冠軍,今個轉會窗可能會係關鍵因素,根據傳媒報道,AC米蘭已基本鎖定兩名新援,或者會為球會帶嚟正面衝擊。

(AC米蘭奪得2010-11意甲冠軍)

其實最近有唔少好球員仍然係自由身,或者即將成為自由身,其中一個最矚目嘅就係文素基治(Mario Mandzukic)。呢位相當全面嘅克羅地亞中鋒,於去年夏天離開卡塔爾聯賽後竟然一直未有落班,但34歲嘅佢仍然具有一定質素。根據Goal等多間傳媒報道,AC米蘭即將與文素基治簽約半年,另加按上陣次數而觸發嘅續約條款,顯然係希望為下半季爭冠之路提供即戰力。


AC米蘭現時相當倚重伊巴謙莫域嘅入球能力,佢僅於聯賽上陣7場已攻入10球,絕對係寶刀未老。伊巴謙莫域一旦落場比賽,佢嘅作用絕對毋庸置疑,不過畢竟已39歲,佢嘅傷患係AC米蘭一大隱憂,上半季佢就曾經試過重傷一段時候。同樣可踢正箭頭嘅列碧(Ante Rebic)助攻強於入球,今季暫時錄得1入球6助攻,最近亦感染武漢肺炎缺陣。另一位可以擔任正箭頭嘅拉菲爾利奧(Rafael Leão)雖然表現不俗,但都只係21歲。因此,曾效力祖雲達斯嘅文素基治絕對可以成為AC米蘭輪換中鋒嘅可靠人選,佢嘅入球能力不及伊巴,但策應能力亦可為球隊帶嚟幫助,唯一擔心之處當然係佢由前往卡塔爾「挖金」直至近半季冇班落,狀態到底有幾多?

AC米蘭另外一筆極大機會完成嘅交易,係由車路士簽入後衛杜莫利(Fikayo Tomori)。根據Sky Sports報道,AC米蘭接近以租借形式簽下杜莫利,並可能加入一項2500萬鎊買斷條款。23歲嘅杜莫利係車路士青訓出品,曾經歷3次外借,包括2018-19球季借用到領隊林柏特嘅舊東家打比郡。季初,車路士因為中堅魯迪加有機會離隊而決定將杜莫利留用,但佢今季至今只得到1次英超後備上陣機會。林柏特喺上一仗後坦言對於將杜莫利外借,持開放態度。


杜莫利頂級聯賽經驗唔多,一旦要去意甲踢波,仲要適應新環境,「即食」程度成疑。不過,杜莫利嘅潛質得到肯定,已曾入選大國腳,今次亦有數間英超球會有意出手爭奪。對於AC米蘭,陣中4名正宗中堅之中,現時倚重羅馬洛利(Alessio Romagnoli)及卡積亞(Simon Kjaer),梅沙基奧(Mateo Musacchio)屬板凳之選,加比亞(Matteo Gabbia)就重傷,所以真係捉襟見肘,兩名主力中堅一旦傷停,杜莫利就會派上用場。至於車路士同唔同意加入買斷條款,放走一位英籍球員兼青訓出品,就要等待更新報道。


Source: Sky Sports、Goal

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→