39歲沙維手術刀式直線再現,夥拍加比勇奪卡塔爾聯賽冠軍

睇足365 於 06/04/2019 發表 收藏文章
前巴塞隆拿中場大師沙維嘅職業生涯奪冠無數,2015年嘅佢選擇喺職業生涯最後階段前往卡塔爾聯賽,除咗「掘金」之外,當然以征服卡塔爾聯賽為目標,而佢亦終於喺第3季成功協助球隊奪得卡塔爾聯賽冠軍,為佢嘅職業生涯劃上完滿句號。


喺最近嘅卡塔爾星級足球聯賽第21輪,沙維效力嘅艾薩德 (Al Sadd SC) 主場迎戰多哈艾阿里 (Al Ahli Doha) 。沙維喺比賽23分鐘送出招牌式直線,通透穿過對手整條防線,隊友單刀射門被門將擋出後,第一時間補射入網,可見沙維嘅眼界、技術仍存。


最終,艾薩德以7-2大勝多哈艾阿里,提前一輪奪得聯賽冠軍,令到沙維職業生涯第33個錦標,其中有25個獎盃係為巴塞隆拿奪得,喺艾薩德就取得4項冠軍,另外仲有喺西班牙國家隊嘅世青盃、歐國盃2個,以及世界盃。另外,今次同沙維一齊捧起冠軍盾牌嘅,仲有另一位西班牙人——前馬德里體育會隊長加比。


沙維近年已為轉職教練做好準備,39歲嘅佢今季只為球隊上陣11場,仍貢獻2入球5助攻,根據2018年12月時《馬卡報》嘅訪問,沙維當時表示「我99%會喺今季喺掛靴,除非奇蹟出現。我正受訓成為教練,我喜歡呢個工作,希望以呢個方式留喺球場。」不過,沙維亦曾表示會喺上季結束時退役,結果最終決定暫延退役計劃,今次又會唔會變掛呢?


Source: Marca

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • vty11
    vty11 於 06/04/2019 評論 NO. 1

    好很勁!

快捷鍵:←
快捷鍵:→