2R走人基拿比高文唔夠用?拜仁慕尼黑證實有意求購利萊辛尼

睇足365 於 24/05/2019 發表 收藏文章
德甲班霸拜仁慕尼黑今季表現不穩,鬥到聯賽最後一場先正式取下聯賽冠軍,其中一個原因係球隊處於換代階段。兩位老將洛賓及列貝利組成嘅「Robbery」組合宣布解散,兩人將於季後雙雙離隊,同時年輕嘅基拿比及京士利高文以接班人之姿,季內逐步站穩主力位置,不過拜仁慕尼黑仍有打算喺兩翼位置補充。

曼城翼鋒利萊辛尼喺2017-18球季乃球隊奪冠主要功臣之一,2018-19球季曼城引入馬列斯後,加上史達寧狀態持續火熱,仲有貝拿度施華可出任邊進攻中場,球隊兩翼競爭異常激烈,利萊辛尼雖然仍於聯賽上陣31場,但已失去上季嘅絕對主力位置,場均上陣時間縮減至約60分鐘,只有21場聯賽以正選身分列陣。

loading


坊間早有傳聞,指拜仁慕尼黑有意將呢位23歲德國國腳帶返德甲。根據《Sky Sports》報導,拜仁慕尼黑主席漢尼斯 (Uli Hoeness) 近日親口承認,球會正處理與利萊辛尼相關事務,意味著拜仁的確正嘗試收購利萊辛尼。

引用"Yes, we are dealing with that name at the moment."

loading

loading


利萊辛尼雖然喺曼城上陣時間減少,但仍然係主帥哥迪奧拿重視嘅球員,事實上,佢今季仍然於各項賽事上陣47場,射入16球及交出18個助攻。哥迪奧拿早前曾經向傳媒表示,球會需要利萊辛尼,而且一直嘗試與佢簽下新合約。哥帥強調自己理解球員嘅憂慮,但佢仍然十分重視利萊辛尼,「佢 (利萊辛尼) 要同史達寧同貝拿度施華競爭,呢件唔係容易嘅事。我哋需要四線作戰,所以要有利萊辛尼、史達寧、馬列斯同貝拿度施華,如果只有一對翼鋒,根本唔可以四線作戰。」


呢個相信亦係拜仁嘅考慮,喺「2R」離隊之後,拜仁陣中暫時只剩低基拿比及京士利高文可歸類為主力兩翼人選,另外就要數到19歲南韓翼鋒鄭優營 (Woo-yeong Jeong) 及18歲加納翼鋒艾方索戴維斯 (Alphonso Davies) ,如應付多線作戰,有一定難度。不過,既然拜仁視基拿比及京士利高文為重點栽培對象,辛尼轉投拜仁亦要面臨激烈競爭 (除非三人其中一人改踢中路,例如基拿比就曾司職影子前鋒) 。既然哥迪奧拿用人並非厚此薄彼,只係因時制宜,辛尼喺曼城仍然得到哥帥重視及栽培,相信比離隊選擇更好 (若哥帥來季仍執教曼城)。

Source: Sky SportsGoal

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→