高治又有偉論:我認識碧咸、摩迪、巴爾呢啲頂級球員,但最勁嗰個係謝拉特!

睇足365 於 15/09/2018 發表 收藏文章
無論你點樣評價,英格蘭長人高治 (Peter Crouch) 總係有喺英倫球壇總係有立足之處,2.01米嘅身高對佢嘅球隊嚟講係一大殺著。37歲嘅高治除咗身高鶴立雞群,都經常有出位言論,係搞笑能手。


高治試過話自己勁過C朗,因為自己英超入波多過佢,又會模仿C朗嘅薩瓦人慶祝動作。C朗對祖雲達斯射入世界波倒掛,佢又喺twitter話:「呢樣嘢得我哋做到咋!」


不過點都好,你可能當高治係笑料,但佢喺球場上一啲都唔失禮,因為佢生涯累積106個英超入球 (上陣461次),喺英超歷史射手榜上位列23。雖然一直不被睇好,但喺國家隊都上陣42次射入22球,國家隊歷史射手榜上排第16位。今年隨史篤城降落英冠,更射入個人喺英格蘭球壇第200個入球!

loading


高治最近推出自傳,又接受訪問,講到自己合作過最勁嘅球員:

「我好慶幸曾經喺熱刺同摩迪、加利夫巴爾合作過,喺英格蘭國家隊又同碧咸、朗尼呢啲頂級球員一齊踢過波,不過係謝拉特,令我覺得佢無所不能。


我仲記得細個曾經同佢對壘,當時我效力熱刺青年軍,佢就喺利物浦青年軍。我第一次見佢嘅時候,佢喺禁區邊爆過一個人,再過兩個人,然後以我見過最高難度嘅射門打中門楣。嗰陣我諗,嘩呢個邊個嚟架?

喺國家隊訓練,即使喺眾多世界級球員之中,佢又係最勁最勁嗰個。就算你擺佢踢右閘,佢都可以做全場最佳。

佢係我合作過最勁嘅球員,如果你問我點樣做一個好球員,學謝拉特啦!」


38歲嘅謝拉特,雖然只比高治年長半年,但今季已經執起教鞭。佢帶領蘇超傳統勁旅格拉斯哥流浪,暫時開季四戰一勝兩和一負,排第七位,想挑戰前利物浦領隊羅渣士帶領嘅些路迪,睇嚟要加把勁。

loading


Source: Anfield WrapSportbibleCrouch Twitter

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→