食到咁偏?曼城母公司宣布入主中乙球隊四川九牛

睇足365 於 20/02/2019 發表 收藏文章
英超球會曼城近年喺英超風頭一時無兩,佢嘅母公司城市足球集團 (City Football Group) ,喺世界各地唔同聯賽都擁有其他球隊,例如美職聯球隊紐約城等。今日,中乙球隊四川九牛官方宣布,球會獲得城市足球集團為首嘅三方收購。城市足球集團睇中呢支中國第三級別聯賽球隊令人感到驚訝,相信四川九牛好快會以全新面目喺中國足球形成新氣象。


根據中國傳媒報導,2月20日下午,中乙球隊四川九牛召開記者會,宣布城市足球集團入主,城市足球集團聯同優必選城市體育產業發展有限責任公司,以及中國健騰體育產業基金會三方共同收購球會。《Sky Sports》引述城市足球集團CEO Ferran Soriano喺記者會上表示,城市足球集團已經喺中國工作一段時間,認為中國係有龐大潛力嘅足球市場,正在以四川九牛為中心,建立一個長遠、可持續嘅中國足球人才培養計劃,第一步將會係集中於提升球會成績及與球迷建立關係。



城市足球集團由阿聯酋皇室控制嘅阿布札比聯合財團擁有,現時旗下球隊包括曼城、紐約城、澳職墨爾本城、日職橫濱水手、西甲球隊基羅納及烏拉圭球隊Torque。


資料顯示,四川九牛於2017年1月成立,參加業餘聯賽,2018球季即升上中乙聯賽,馬上喺中國足協盃上成為黑馬,越級擊退中甲球隊大連超越及中超球隊長春亞泰,成為歷史上首支晉身中國足協盃八強嘅中乙球隊。聯賽方面,四川九牛喺2018中乙聯賽,26戰只取得6勝9和11負,排南區第12位,排名戰以全國第24名完成。


根據城市足球集團CEO所講,以及其他報導,城市足球集團已經喺中國尋找適合嘅球會多時,早於2018年底亦已經開始部署入主四川九牛事宜,包括由合作夥伴「優必選」集團董事郝賽玉出任四川九牛法定代表人及董事長,及於2019年1月獲中國足協批評並公布由「優必選」集團全資擁有嘅北京映像匯文化創意有限公司,收購球會86.11%股權。另一方面,收購四川九牛嘅其中一方,中國健騰體育產業基金會係由華人文化、紅杉資本於2018年成立,當中華人文化擁有城市足球集團13%股權。

相信城市足球集團入主四川九牛後,將會用盡一切方法「力谷」四川九牛於兩季之內連續升班到中超,同時開始喺當地開展大規模足球基建工程及建立完善青訓系統,正如曼城喺「暴發」背後,正因為一開始著力投資青訓,近期已經進入收成期,培育出查頓辛祖、巴謙迪亞斯等吸引到其他歐洲頂級豪門嘅青訓產品。城市足球集團CEO明言,希望幫助中國足球發展,幫助培養年輕嘅教練及球員,踢出曼城嘅風格。呢種由基層足球做起嘅培訓,相信遠比中國足協近年嘅政策更為有效,回想起中國國家主席習近平到訪英國時,正係到曼城訓練基地參觀,可見城市足球集團或背後嘅阿布札比同中國關係密切,莫非所謂「中國足球夢」嘅新一步就係由四川九牛開始?

Source: SkySportsCityFootballGroup

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→