韋亞之子確認一月外借離PSG,傳將落戶些路迪半季

睇足365 於 26/12/2018 發表 收藏文章

佐治韋亞 (George Weah) 於90年代叱吒球壇,今時今日已經貴為祖國利比利亞 (Liberia) 總統,佢個仔添莫菲韋亞 (Timothy Weah) 就喺足球場上嶄露頭角,今季獲巴黎聖日耳門提升上一隊,更於季初已取得個人生涯首個法甲入球,不過為咗進一步爭取上陣機會,佢將會喺一月外借離隊。


佐治韋亞由雲加發掘加盟摩納哥,後來曾經效力巴黎聖日耳門、AC米蘭等球會,更於1995年榮獲金球獎 (Ballon d'Or) ,成為史上第一位國籍為歐洲以外嘅金球獎得主,直至今日仍然未有第二位非洲球員取得金球獎。添莫菲韋亞似乎繼承咗父親嘅足球天賦,佢喺2014年加入PSG青年軍,今季被提拔上一隊。


年僅18歲、司職前鋒嘅添莫菲韋亞要喺PSG群星中爭一席位絕非易事,雖然佢喺季初乘一眾參加世界盃嘅球星狀態未足,得到上陣機會,但隨著眾星回歸,佢主要時間仍然係為預備隊上陣。呢個年紀正值球員成長重要關頭,因此添莫菲韋亞最近喺Instagram上公布自己將會喺一月外借離隊,並感謝PSG給予機會及栽培,希望自己完成外借之後,變得更強後返到PSG效力。



添莫菲韋亞未有說明目的地,不過根據《ESPN》及《Guardian》報導,相信佢好有機會被外借到蘇超冠軍些路迪,跟隨前利物浦主帥羅渣士,法國傳媒《RMC》就指現時留喺球會任職嘅前些路迪中堅高路托尼(Kolo Touré) 已經成功說服添莫菲韋亞選擇些路迪,而拒絕其他來自英超嘅邀請。

添莫菲韋亞並冇跟隨父親選擇效力祖國利比利亞,而係效力出生地美國,佢現時已經為美國大國腳上陣8場,射入1球。


Source: ESPNGuardian

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→