靚仔到咁!小沙維治成明日之星,與曼聯簽職業合約

睇足365 於 10/04/2021 發表 收藏文章
講起沙維治,大家會諗起昔日留有一頭瀟灑飄逸、但踢法相當勇悍嘅前威爾斯國腳Robbie Savage。講外型,各花入各眼,但小弟就覺得沙維治都相當有型;踢法方面,佢嘅狠辣防守就令人聞風喪膽,一度保持著英超史上最多黃牌紀錄,整個英超生涯共有89張黃牌咁多!部分球迷或者唔記得,沙維治其實於曼聯出道,可惜獲提拔後未曾為曼聯一隊上陣。最近,外型同場上位置都同沙維治相似嘅小沙維治亦與曼聯簽約,佢可唔可以承繼父親衣缽,甚至青出於藍?


曼聯於近日宣布與查理沙維治(Charlie Savage)簽下職業生涯,意味著17歲嘅沙維治之子與父親一樣於曼聯出道成為職業球員。爸爸羅比沙維治於1991年加入曼聯青年軍,到1993年成為職業球員,但同期獲提拔嘅有「七小福」史高斯等人(大部分七小福成員於當季亦難獲上陣機會),令沙維治球季結束後毅然轉會處於低組別嘅克魯(Crewe Alexandra)尋求機會,三季於英乙打滾後,沙維治表現獲英超球隊李斯特城賞識,馬上成為主力球員。佢其後亦效力過伯明翰、布力般流浪、打比郡及白禮頓,又為威爾斯國家隊上陣39次。佢嘅中場掃盪效率係一大特色,同時亦係犯規「慣犯」,於英超賽場累積89張黃牌,一度係英超史上最多,其後被保耶、奇雲戴維斯及史高斯超越。


最值得留意嘅係,原來46歲嘅沙維治仲踢緊波,根據轉會資料網站 Transfermarkt 顯示,沙維治喺2019年復出加盟半職業球隊史托港(Stockport Town FC),佢喺2020年10月仲轉咗會去馬斯菲特(Macclesfield F.C.,原稱Macclesfield Town F.C.但於2020年解散重組,將於2021-22球季重新參加英格蘭第10級別聯賽,據悉沙維治加盟球隊係以義工形成協助新球會早期發展)。咁啱小弟兩隊波都聽過,玩開Football Manager嘅朋友話唔定都識!

loading


講返囝囝查理沙維治,話說查理仔雖然只得17歲,但因為表現出色而被提拔到U23,睇返佢早前喺英超U18聯賽嘅數據,上陣17場,2入球5助攻,場上位置係中場中,而黃牌只有1張,似乎就冇爸爸咁易拎黃牌。有英國傳媒形容佢有著出色嘅防守效率及擁有傳球能力,即係屬於墮後型中場。另一方面,小弟一見到佢張相,第一個反應係「靚仔」(利申非gay),佢髮型唔算長頭髮定一樣係飄逸類,但外表就比較斯文。


另外,查理沙維治表示自己喺足球上學習嘅對象係「師兄」麥湯文尼,而麥湯文尼得知查理沙維治簽約後亦喺相關帖文下面留言恭賀。爸爸羅比沙維治亦表示以兒子為榮,寄語佢要相信自己及不斷努力。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→