雲杜拿否認請辭:這場比賽證明國家隊沒有問題,我只能為結果向意大利人道歉

睇足365 於 14/11/2017 發表 收藏文章
2018世界盃外圍賽附加賽次回合,意大利喺主場以0-0賽和瑞典,以總比數0-1出局,係呢支四屆盟主自1958年以來第一次缺席缺賽周。意大利足總舊年出人意表地任命老帥雲杜拿 (Gian Piero Ventura) 為國家隊主帥,本來已經備受質疑,依家再寫下尷尬歷史,相信佢都冇得留低,不過雲杜拿喺賽後就澄清,自己仲未向足總請辭。


雲杜拿喺呢兩場附加賽中,選兵排陣都有唔少值得討論嘅空間,例如係喺拿坡里踢到識飛嘅恩斯治尼被投閒置散,如果球隊踼得順風順水,自然冇人出聲,但意大利本來已經有今季意甲入球率極高嘅恩莫比利,依家兩回合都入唔到一球,雲杜拿少不免要負全責。

雖然大家賽前都知意大利有機會出局,但世界盃冇意大利呢個消息始終難以消化,喺賽後就有一大堆新聞湧出嚟,包括保方、巴沙利、迪羅斯等老將齊齊退出國家隊,亦都有傳雲杜拿馬上引疚辭職,連《Sky Sports》都有報導雲杜拿辭職嘅消息。

不過,喺賽後記者會遲到嘅雲杜拿就否認請辭:「我仲未辭職,因為我仲未同足總主席傾過。好抱歉我遲咗,不過我要逐一向我曾經共事嘅球員致敬。」


佢表示,對於能夠成為藍衣軍團嘅一分子感到自豪,而且佢都對於今場比賽嘅結果感到失望。不過聽佢口氣,似乎唔認為自己有問題:

「我最大嘅失誤係喺對瑞典嘅首回合比賽,之前我哋一直喺正軌上面。個問題係我哋冇辦法有效避免嗰個失波,而嗰個係一個折射省中人嘅入波。我已經教咗波好多年,所以我可以接受唔同嘅聲音。依家再講其他嘢已經冇意思,我唔會再講更多。」

「我為個結果而道歉,但唔會為我哋付出過嘅努力而道歉。我知道結果先係最重要嘅事。」

「今晚嘅比賽顯示,國家隊冇任何問題 (Tonight's game showed that there was nothing broken in the Nazionale)。我依家能夠做嘅,就係向意大利人道歉,不過呢樣嘢唔會影響我哋嘅專業同所付出嘅努力。」

另外,雲杜拿對於辭職定留任都冇明確答覆:「我會同足總會面……喺呢個時候我覺得唔適合談論去留。我哋將會討論呢個問題,喺會面上作出嘅任何決定我都會接受。」

雖然話雲杜拿依家仲未請辭或者俾炒,不過相信拎住入唔到世界盃決賽周呢個結果,雲杜拿都一定冇得留低,咁點解唔知情識趣,直接宣佈辭職呢?


記者會片段:

https://youtu.be/u29lPBqz9SA
Source: ESPNGoal

如果喜歡我們的文章,請即分享到︰

留言


請按此登錄後留言。未成為會員? 立即註冊
  • loklok14351 於 14/11/2017 評論 NO. 1

    呢個老嘢仲有面目出嚟見人?!臉皮咁厚

  • kinfung 於 14/11/2017 評論 NO. 2

    意大利的確系青黃不接,比起以前有巴治奧、韋利、大簡、托迪、馬甸尼、迪比亞路個個年代差左好多,但系以目前人腳都冇理由對瑞典一球都入吾到,有小法老同恩斯治尼又吾出,有jorginho又吾早早比機會,領隊問題的確系最大

  • Caleb Chou 於 14/11/2017 評論 NO. 3

    國家隊冇問題
    你有問題姐……

快捷鍵:←
快捷鍵:→