【雲加最強後盾】班主高安基欲進一步收購股份,阿迷組織強列反對

睇足365 於 04/10/2017 發表 收藏文章
根據英國傳媒報導,阿仙奴最大股東高安基(Stan Kroenke)近日計劃出資超過5億鎊,收購第二大股東烏斯曼諾夫 (Alisher Usmanov) 手上嘅30%股份,進一步獨大。由阿仙奴球迷組成嘅 Arsenal Supporters' Trust 都係阿仙奴嘅小股東,佢哋得到消息之後,發起行動,聯絡烏斯曼諾夫,希望佢千祈唔好賣股份俾高安基?有留意開嘅話,大家就會明白點解阿仙奴球迷咁驚呢位美國班主喇。


阿仙奴自從搬去酋長球場之後就一沉不起,當年不敗奪冠嘅威勢一去不返,近年喺領隊雲加出色嘅財政管理之下終於還清興建新球場嘅債務,接連簽入奧斯爾、山齊士等球星,卻又更見球隊喺戰術方面嘅不濟,簽多幾多巨星都冇用,最令人痛心嘅係球隊往往表現唔出足夠嘅爭勝心。有唔少人將所有責任歸咎於雲加,當然都好有道理,但有球迷就認為雲加之所以屹立不倒,大有可能係同阿仙奴班主高安基有關。


美國商人高安基用佢旗下嘅 Kroenke Sports & Entertainment 持有咗唔少體育隊伍,睇下佢哋就會大致明白高安基係咩人。


NBA球隊丹佛金塊 Denver Nuggets ,高安基喺2000年已經成為佢嘅班主,金塊喺之後曾經坐擁 Carmelo Anthony、Allen Iverson 等球星,但一直都係季後賽首圈就出局,似足阿仙奴「歐聯16郎」嘅命運。由2013-14球季至今,金塊更連年缺席季後賽。


MLS美職聯球隊科羅拉多急流 Colorado Rapids,高安基旗下另一支足球隊,佢由2004年成為班主之後,球隊拎過2010美職聯冠軍,但14年裡面,7年入唔到季後賽,12年入唔到中北美洲冠軍盃 (相當於阿仙奴入唔到歐聯) ,今年常規賽踢咗31場仲排緊全聯盟尾二。


NHL冰球隊科羅拉多雪崩 Colorado Avalanche,高安基喺2000年買入球隊當季,就贏咗總冠軍 (史丹利盃 Stanley Cup),然後開始衰落,近15季入面有8季入唔到季後賽,2016-17球季仲以西岸包尾完成球季。


NFL 美式足球隊洛杉磯公羊Los Angles Rams,高安基喺2010年完成收購當時嘅聖路易公羊,球隊由2005年開始從未打入季後賽。


整體嚟講,高安基旗下冇一支球隊係喺佢治下茁壯成長,甚至可以話係每況愈下。感覺上,佢就好似香港人買藍籌股收息一樣,但求長線穩陣有錢賺。其他運動唔講,阿仙奴嚟計,年年保住個英超前四賺一筆 (雖然上季已經失敗) 、賺電視轉播費、商業收益、全英最貴季票,只要有錢賺,估計佢唔會介意拎唔拎到冠軍,有留意NBA嘅朋友可以諗下金塊自從Carmelo Anthony走咗之後做過啲乜就明。


缺乏爭勝心,由班主開始。老細都滿意咯,你仲出咩聲姐?難怪有球迷認為,雲加之所以不動如山,除咗佢嘅功績之外,仲因為班主根本好滿意球會盤數,萬一換領隊之後崩潰,對班主嚟講先係大災難。


高安基現時已經持有阿仙奴67.05%股權,而第二大股東烏斯曼洛夫就有29.25%。早前,英國傳媒報導過烏斯曼諾夫對於高安基嘅保守非常不滿,喺今季之前曾經計劃收購佢嘅股份,但高安基堅決拒絕。到依家,情況相反,高安基出資5.25億鎊希望收購烏斯曼諾夫手上嘅股份,咁佢就可以一人獨大 (其實烏斯曼諾夫本身已經被高安基壓制到,身為第二大股東都冇得入董事會) ,獨佔近97%股權。

阿仙奴球迷相當擔心高安基一旦成功買到股份,就會部署將球會私有化。阿仙奴球迷組成嘅小股東 Arsenal Supporters' Trust 只係得大約2%股份,難以改變大局,唯有聯絡烏斯曼諾夫,希望佢企硬,唔好將股份賣出。


Source: ESPNDailyMailGurardian

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→