【難扶阿斗】中國隊三次送禮吞伊朗三蛋,納比最後一仗嬲到提早走人

睇足365 於 25/01/2019 發表 收藏文章
亞洲盃8強,中國面對「亞洲一哥」伊朗,主流賽前評論已估計中國輸波係情理之中,畢竟伊朗於FIFA世界排名上位列第29位,係亞洲球隊中世界掛名最高,而中國就只排76位;實際戰績方面,伊朗喺2018世界盃分組賽展現出驚人韌力,曾擊敗摩洛哥及逼和葡萄牙,只以一球僅負於西班牙,已經證明自己有力同世界列強一戰,賽前更已錄得連續11場不敗。雖然中國隊實力上確實不及伊朗,但場面上嘅表現就令到最後一次領軍嘅納比十分失望。


曾經率領意大利奪得2006世界盃冠軍嘅納比 (Marcello Lippi) ,2016年10月上任成為中國國家隊主帥,中國傳媒早已報導,今屆亞洲盃將會係納比嘅告別作。中國喺今屆亞洲盃分組賽擊敗同組對手吉爾吉斯及菲律賓,以次名出線,16強驚險反勝泰國晉身8強,事實上該仗係中國隊14年嚟首次喺大賽淘汰賽取得勝仗。

今仗開賽後不久,中國已經有蒿俊閔於反擊攻勢中得到入球機會,但未能把握,第10分鐘就輪到伊朗幾乎取得入球,幸有隊長鄭智護空門。及後,中國隊形勢急轉直下,守將馮瀟霆控球失誤,被阿斯蒙搶先一步,傳予達利米後上撞射入網,伊朗先開紀錄。


31分鐘,中國後衛劉奕鳴以類似方式,同樣被阿斯蒙加速快一步奪球,單刀為伊朗擴大比數至兩球。


補時階段,石柯控球離腳,安沙列法特長驅直進單刀埋齋,令伊朗大勝3-0,晉身4強面對日本。


根據中國傳媒報導,主帥納比對於中國隊表現極為失望,傳聞佢喺中場休息時因為中國連失兩球,於更衣室大發雷霆及怒擲物件發洩,下半場補時階段目睹第三個失球後更提早返回更衣室,完場時直播鏡頭並冇拍攝到佢嘅身影,只留低佢嘅助手同伊朗主帥基羅斯握手。報導又指納比喺賽後再次喺更衣室內發火,更因激動地批評球員表現,導致佢喺稍後嘅賽後記者會上聲線沙啞。


納比喺賽後記者會上,解釋指自己身患感冒導致聲線沙啞,佢又表示雖然已預料伊朗技高一籌,但難以預計中國以多次失誤嘅方式敗陣,納比再次宣布自己已經完成同中國足協嘅合約,表示自己已盡最大努力去令中國隊成長,又感謝中國球迷支持,最後向在場記者道別。盛傳有可能係最後一次代表中國國家隊上陣嘅隊長鄭智,同納比不約而同表達失望之情,佢哋都認為比賽可以輸,但今場表現係令人失望。有國內球迷認為,今場比賽中國隊出現三次失誤,可以歸納為技不如人,由於伊朗實力全面佔優,令中國球員喺心理壓力之下犯錯,多次出現判斷失誤,與其歸咎於偶然、不幸嘅失誤,不如話係技術及心理質素欠佳,心理質素一點亦正係納比早前指出球隊嘅弱點所在。


根據中國足球平台《懂球帝》意見調查,納比執教中國隊27個月以嚟,喺重要賽事中取得6勝2和3負,有59%球迷認為球隊表現大有進步,31.7%認為冇太大改變,只有9.3%認為納比領軍表現不及格。事實上,一支國家隊需要取得顯著進步,絕對唔係兩三年內可以做到嘅事,需要國家足協政策、青訓、國內聯賽等多方面配合,教練只係其中一環,如果以為換一個名帥帶隊就可以一步登天成為世界強隊,就過於天真了。唔係話請名帥冇用,只係唔能夠期望球隊表現會因此馬上大有改善,都係腳踏實地一步一步嚟更加實際。

全場精華 (AFC)

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→