雙紅主帥齊轟球證|高普:不如打摔角吖? 蘇B:我以為打緊欖球!

睇足365 於 23/08/2021 發表 收藏文章
究竟條標題講緊乜?兩隊波嘅主帥唔係嗌緊交,亦唔係傾緊偈,而係喺同一周比賽之後不約而同地質疑球證執法尺度過鬆,咁啱都拎咗另一種運動嚟做比喻,唔知球迷們又buy邊瓣呢?

(設計對白:英雄所見略同!)

喺啱啱個星期六,利物浦率先主場出擊,由迪亞高祖達及沙迪奧文尼各入一球,以2:0擊敗般尼,看似輕鬆,其實高普一樣咁肉緊,因為佢除咗要贏波之外,仲想保護麾下球員。高普對於般尼部分比較粗野嘅攔截感到不快,對佢嚟講,對手踢得硬朗唔係問題,問題係球證並冇對一啲粗野嘅攔截作出有阻嚇性嘅懲罰,變相係更鼓勵球員變本加厲。

loading

高普接受賽後訪問時表示:「我哋時刻要為一場硬仗做好準備,而我哋做到了。你可以見到艾殊尼班尼斯同基斯活特點樣攔截雲迪克同馬迪普。

我唔係100%肯定球證執法嘅方向正確。情況好似倒退10至15年咁。球例係咁就係咁,但你冇辦法為而家呢個情況辯護,咁樣令到球賽變得棘手。我覺得咁樣係唔啱,但我冇辦法改變現況。聽講話咁做係要保持球賽流暢,但而家就變成咁。之前賓福特對阿仙奴入第二球一定係犯規在先,你冇可能撓住門將隻手,然後話『踢波係咁㗎啦』。我覺得我哋需要再三考慮呢個方向係咪正確。

話就話俾球賽流暢進行,但冇人知道實際上係代表咩。我覺得判決對進攻方有利係冇問題,但我哋更需要保護球員。如果你想睇嗰啲場面嘅,可以去睇摔角。」

loading

唔知高普係唔係講緊以下呢球呢?
https://twitter.com/Biggies_MaIIs/status/1429176795862085636

高普又話,任何執法尺度上嘅轉變都係一種信息,會改變球員嘅行為,例如尺度變緊會鼓勵球員誇大被踢時嘅反應,甚至插水,而尺度變鬆就會鼓勵球員粗野攔截,所以覺得應該要大家一齊坐低傾吓想點做。Sky Sports報道認為高普某程度上係回應英超球證主管萊利最近單方面表示今季內會推行改革,令球賽運行更流暢。

一日之後,曼聯作客修咸頓,雙方踢成1:1平手,蘇斯克查認為,主隊先開紀錄一球當中,史堤芬斯從般奴費南迪斯腳下搶波時有犯規之嫌,佢表示球證執法尺度過鬆:「似乎足球已經由一個極端就到另一個極端。

當然,我哋應該做得更加好,當球證冇吹罰時,應該確保可以封堵對方射門……我哋需要喺得唔到吹罰時更快作出反應。雖然係咁,但嗰吓的確係犯規。史堤芬斯從背後撞倒般奴,佢嘅臀部同手臂都撞咗埋去……

我哋唔可以由一個極端就到另一個極端,例如上季就打籃球咁,今季就打欖球咁。我鍾意一個講法,話樣更加係男人嘅足球,但犯規就係犯規。」

loading

loading


不過,另一位曼聯名宿——堅尼就唔同意蘇斯克查嘅睇法,佢認為史堤芬斯嗰吓完全係合法碰撞,仲話般奴費南迪斯應該要硬淨啲。

loading

兩位主帥先後批評球證執法尺度,各位球迷又覺唔覺得今季英超真係硬淨咗呢?

來源:
https://www.skysports.com/football/news/11095/12386991/liverpools-jurgen-klopp-unhappy-after-burnley-win-protect-players-or-watch-wrestling
https://www.skysports.com/football/news/11095/12387843/ole-gunnar-solskjaer-says-new-premier-league-rules-must-not-turn-football-in-rugby

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→