阿積士幕後功臣 傳雲達沙重返曼聯任體育總監

睇足365 於 11/09/2019 發表 收藏文章
傳聞曼聯希望尋找一名體育總監加入球會,已非今日之事,但喺今季開始前,卻未有成事。根據最新傳聞,原來曼聯其中一位目標正係前紅魔門神雲達沙 (Edwin Van Der Sar) ,看似合情合理,但成數有幾高,就留俾閣下判斷。


雖然雲達沙重返曼聯任職嘅消息只係由《Mirror》傳出,但近年球壇趨勢正係尋找熟悉球會運作嘅名宿重返球隊擔任幕後工作,以雲達沙於阿積士取得成功,及與曼聯嘅關係,曼聯有意邀請佢絕對係合情合理,只係成事指數尚有疑問。



首先,阿積士今季將繼續出戰歐聯,雲達沙未必願意此時此刻離開,而且假設雙方真係取得共識,點解唔喺球季開始前發生?另一方面,雲達沙嘅太太曾經腦中風,雖然已康復幾年,但雲達沙可能會因為家庭因素而決定留喺荷蘭。而且,雲達沙喺阿積士嘅日子比喺曼聯更長,現時更看似同奧華馬斯等球會高層建立唔錯嘅合作關係,而去到曼聯就要面臨極大壓力,同時去到曼聯要喺班主、活華特、蘇斯克查之間周旋,未必可以建立良好嘅工作環境。



最後,提供一條八卦消息,根據報導,英國博彩公司Paddy Power最近將「雲達沙出任曼聯體育總監」嘅賭盤封盤,佢哋表示得悉雲達沙係曼聯頭號目標,加上因為喺星期日晚開始突然收到巨額投注,所以決定提早封盤,係咪有咩啟示呢?

阿積士崛起幕後功臣

現年48歲嘅雲達沙,球員生涯除於2005-2011年間效力曼聯之外,於出道初期曾效力荷蘭傳統勁旅阿積士長達9年 (1990-1999),更曾為球隊射入其個人生涯唯一入球。雲達沙掛靴後於告魯夫學院取得體育及品牌管理碩士學位,並且於阿積士出任市場部總監 (2012)。後來,雲達沙獲升任為阿積士CEO (2016),與足球總監奧華馬斯,成為重建阿積士嘅頭號人物。 (據悉,呢班名宿加入球會,係已故球王告魯夫嘅主意,佢哋仍然按照告魯夫嘅方針行事)

阿積士曾經喺歐洲球壇叱吒一時,但近年競爭力大不如前,直至上季歐聯以黑馬姿態一舉殺入四強,成為一時佳話。事實上,阿積士於歐洲賽場上雖然可謂「家道中落」,但佢哋嘅青訓世界仍然係聞名,不斷出產大量雙優質年輕球員,只係喺波士文條例加上全球化,呢啲年輕球員往往老早就轉會到歐洲五大聯賽球會,尋求足球上及經濟上嘅機遇。例如,阿積士於歐聯四強嘅對手熱刺,陣中正正有四名主力球員維頓漢、艾達韋列特、艾歷臣、戴雲遜山齊士同樣曾效力阿積士青年軍,其中維頓漢、艾達韋列特、艾歷臣嘅質素同樣屬於 (或曾經屬於) 自己位置上嘅世界前列,戴雲遜山齊士就係熱刺正培育嘅後起之秀。

呢間造星工廠之所以能夠重新上路,相信好大原因在於球隊改變經營策略,成功留住一班正急速冒起嘅新星,令佢哋最少可以留隊踢多幾季,報效母會,結果成功「捱大」呢班曾經於歐霸決賽不敵曼聯嘅年輕小子,於2018-19歐聯兩次賽和拜仁、擊敗皇馬、祖雲達斯。



阿積士喺雲達沙主理下嘅經營策略,喺佢早前一之訪問中可見一班,當時佢透露曾經與奧華馬斯親自召見一班年輕新星:「我哋同佢哋講,如果想成為阿積士嘅傳奇,就要為球會贏得重要榮譽。我覺得呢個會面對佢哋係好有啟發性。

佢哋對球會有信心。我哋要同年輕球員講,等我哋、信我哋,我哋會令球隊變得更有競爭力。結果佢哋嘅信心創造奇蹟。

我同奧華馬斯都曾經係球員,我哋都曾經喺某個時刻離巢,尋求新挑戰,所以我哋知道呢啲事遲早會發生喺呢班球員身上。咁樣完全唔係問題,只要你可以貢獻兩個、三個、四個美好嘅年頭盡力為球會賣命,為我哋贏聯賽冠軍、踢出悅目足球,咁你就可以走。而且我哋都需要不斷創造空門俾更年輕嘅球員上位,否則佢哋又會被埋沒。」


簡而言之,雲達沙與其他高層為阿積士訂下明確方向,球會可以繼續做"selling club",但要球場上嘅競爭力保持平衡,唔會過早「收割」,希望陣中不斷有迪列特 (Matthijs De Ligt)、法蘭基迪莊 (Frenkie de Jong)之類處於急速上升期,同時實力已相當充足嘅球員留隊貢獻,然後推陳出新。

假若曼聯真係意屬雲達沙擔任體育總監,估計係希望佢可以主理球會長遠發展策略、處理轉會等事項,重建「紅魔DNA」。



Source: 90min

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→