阿仙奴作客車路士,雲加點解連續兩年坐喺車路士球迷人堆中?

睇足365 於 10/01/2018 發表 收藏文章
阿仙奴領隊雲加早前因為對球證甸恩發表不當言論,而被足總罰停賽三場,令佢喺即將來臨嘅聯賽盃四強,作客車路士嘅倫敦打吡中,冇辦法喺場邊督師,而要喺看台上面做觀眾。原來咁啱喺上年2月嘅聯賽中,雲加作客車路士時,同樣係要停賽,當時佢選擇坐喺一班車路士球迷中間,而佢今次都好可能咁樣做,到底點解呢?聽下佢點講!


喺2017年1月底,雲加因為阿仙奴喺對般尼嘅92分鐘被罰12碼,喺場邊鬧第四球證,講粗口兼且出手推撞而被罰停賽,所以佢喺之後作客車路士一役要喺看台上睇波。當時電視畫面影到雲加坐喺主場球迷區,俾一大班車路士球迷圍住嚟睇波,場面尷尬又趣怪。


因為雲加今次去史丹福橋球場又要上看台,所以有記者問佢點睇,佢分享咗上次嘅經歷,就話唔係咁舒服喎。

雲加話:「上次嘅經驗唔係咁好。喺車路士個球場,作客球迷區包廂係喺更衣室嘅對面,所以由更衣室過去要行大半個球場,行到過去場波都踢咗10分鐘啦。」

因為雲加呢兩次嘅罰則,都容許佢喺開賽前同半場返入更衣室同球員講嘢,所以佢要揀返個近更衣室嘅位置,咁就一定係俾主場球迷圍住喇。雲加表示,今次佢會試下坐第二個位。不過估計基於上述原因,佢點都要好似上年咁架喇。

雲加又話上年有個有趣經歷:「我坐低之後,隔離位仁兄同我講『Hello你好嗎』,我就答返佢『午安』,佢話『我係你嘅園丁呀』。不過我都唔識佢嘅,佢話自己係阿仙奴球迷,但又去車路士嗰邊睇波。」


Source: Sky Sports

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→