迪亞高哥斯達爆發!辱罵球證被逐:「我唔係話佢阿媽,我話我阿媽」

睇足365 於 07/04/2019 發表 收藏文章
迪亞高哥斯達從來都係「雙面刃」,一方面佢作為前鋒表現出色,俾到對手好大麻煩,但另一方面佢動作粗野、脾氣暴躁,經常會「食牌」。不過曾經有分析認為,迪亞高哥斯達其實係一位極狡猾嘅球員,佢深知球證尺度,所以即使「壞事做盡」,無數次叉頸走甩,此前生涯只試過4次直接紅牌,對上一次直接領紅仲要係2012-13球季;迪亞高哥斯達更加會喺得到黃牌警告後180度轉變,馴服如綿羊,所以甚少出事。今次因小事而失控,好耐冇喺佢身上出現過。


啱啱噚晚深夜,西甲前列大戰,巴塞隆拿主場迎戰馬德里體育會。上半場只進行到27分鐘,迪亞高哥斯達被攔截,佢認為對方犯規,但球證並冇吹罰,於是佢十分激動咁轉身向球證大喝,球證隨即吹停比賽,行到DC面前,喺胸前掏出紅牌,將佢趕出場。


其實,球證好少僅僅因為一個球員嘅言語,就馬上決定出示紅牌,所以可以猜測DC好可能講咗一啲極過分嘅說話。根據《阿斯報》及《馬卡報》報導,球證喺賽後嘅球賽報告中,記錄低當時嘅事,球證指DC向佢大叫 "me cago en tu puta madre! me cago en tu puta madre!" 呢句說話係侮辱球證嘅母親,翻譯成英文就會變成 "I shit on your fucking mother" 。事後,DC一直解釋,自己講嘅係自己母親,而唔係球證母親。馬體會亦向賽會作出同樣解釋。

DC被趕出場後,10人應戰馬體會支撐至80幾分鐘,連失兩球,以0-2輸波而回,踢少一人嘅體力因素應該好大影響,而巴塞因為呢場勝仗,已經領先第二位嘅馬體會11分,極大機會奪冠。根據西甲規定,辱罵球證將會被罰停賽4場。難怪連巴塞中堅碧基都不禁要勸DC收聲,據報碧基當時上前同按住DC塊面叫佢冷靜啲,同佢講「你已經要停賽4場喇」。


Source: MarcaAS

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→