轉眼十年——傳奇前鋒阿古路告別曼城

睇足365 於 30/03/2021 發表 收藏文章
有時覺得近年越嚟越難見到一個傳奇的誕生,特別係喺豪門,對於點樣先算係一個傳奇,就有更嚴格嘅標準,尤其係現今球壇能夠長時間效力同一支球隊嘅頂級球員已經買少見少,你踢得兩三季想做傳奇球員真係比較難;另一方面,個人認為現今足球越嚟越重視整體戰術,即係長期靠個別球員能力 “carry” 嘅情況唔係冇,但係少咗,而且可能會越嚟越少(戴多次頭盔,純粹個人感覺)。小弟問咗自己一陣,現今豪門球隊有冇人係仲踢緊嗰隊波,而大家都已經覺得佢肯定係嗰隊波嘅傳奇?其他唔講,個人認為阿古路毫無疑問係曼城歷史上一位稱得上偉大嘅前鋒,似乎曼城會方亦有同感。


講咗咁耐其實就係想講,曼城前鋒阿古路將會喺今個球季結束之後離開球隊,老套講句又係象徵一個時代的終結。曼城官方發表聲明,表示將於今個夏天送別阿古路,聲明嘅標題亦顯示阿古路喺球會嘅地位: “CITY TO BID EMOTIONAL FAREWELL TO CLUB LEGEND SERGIO AGUERO THIS SUMMER” 。聲明簡單回顧阿古路曼城生涯,並宣布佢將於今個夏天合約期滿時自由身離隊。

loading


阿古路於2011年夏天由馬體會加盟曼城,當季已為曼城於對QPR一役射入奠定聯賽冠軍一球,可謂立竿見影,阿古路後來當然為曼城入球無數,但呢一球仍然成為永恆經典,除咗因為當時扣人心弦嘅爭冠形勢,仲有呢一球令曼城史上第一次取得英超冠軍!其後,阿古路再為曼城取得3屆英超冠軍(合共4屆),而每一屆佢都係球隊最重要嘅入球泉源。截至現時,阿古路已為曼城於聯賽上陣271場攻入181球,係球會歷史神射手,同時保持英超最多帽子戲法紀錄(12次)、英超史上外籍球員入球數紀錄、英超歷史射手榜第4位。


聚散有時,32歲嘅阿古路終將離開效力10年嘅曼城,展開職業生涯下一頁。其實,由哥迪奧拿執掌曼城開始,已有評論指阿古路並非哥迪奧拿心目中理想嘅前鋒類型,今季阿古路明顯失去位置,哥帥亦多次排出無鋒陣,阿古路嘅離開已有跡可尋。根據近日傳聞,巴塞隆拿有可能成為阿古路下家,成事的話佢將會與同胞兼好友美斯成為拍檔。

曼城聲明中仲帶出一個重要消息,就係曼城主席宣布將會於曼城主場外豎立阿古路銅像,佢將會同大衛施華及甘賓尼嘅銅像(製作中)並列。

阿古路亦發表公開信:
loading


Sky Sports突發報道:
https://youtu.be/SKToOPaBano

曼城官方阿古路入球精華:
https://youtu.be/UAo2nLSXDbE

留言


請按此登錄後留言。未成為會員? 立即註冊
    快捷鍵:←
    快捷鍵:→