身陷890日入球荒的「前英格蘭新星」比拉軒奴,將改為代表布隆迪國家隊

睇足365 於 06/08/2018 發表 收藏文章
史篤城前鋒比拉軒奴 (Saido Berahino) 曾經係轉會市場上嘅搶手貨,當年係西布朗一顆新星,一度被熱刺睇中,多次鬧轉會不成,最終落戶史篤城,但表現急轉直下,現時隨史篤城降落英冠。根據《BBC》報導,呢位英格蘭前鋒即將轉籍。


比拉軒奴現年25歲,出身西布朗青訓系統,2014/15球季英超上陣38場射入14球,被熱刺睇中,但球會拒絕放人,比拉軒奴因此同球會關係惡化,結果喺一度揚言罷踢及一番「冷戰」之後,終於喺16/17球季1月轉會窗離隊,以1,251萬鎊轉會費轉投史篤城。


落戶史篤城之後,比拉軒奴下半季英超上陣13次錄得零入球,加上喺上半季只為西布朗於聯賽上陣4次,同樣零入球,當時陷入一整季入球荒而被廣泛報導。事隔一年,比拉軒奴喺史篤城繼續顆粒無收,入球荒持續已經超過兩季,達到890日。佢上一次喺一隊比賽入波,已經要數到2016年2月27日,西布朗對水晶宮嘅比賽,對於一位長期游走鋒線嘅球員嚟講,完全唔可以接受。不過,新任史篤城主帥路維特 (Gary Rowett) 就表示,相信比拉軒奴喺英冠可以搵返入波嘅感覺,仲話上任以嚟對佢嘅積極態度印象深刻。


除咗喺聯賽要有新開始之外,比拉軒奴喺國際賽場上亦尋求新機會。佢曾經代表英格蘭各級青年隊47次,但未曾入選大國腳,因此希望可以改為代表家鄉出戰。根據《BBC》報導,英格蘭足協發出證明,明確表示比拉軒奴未曾代表英格蘭大國腳,因此得到國際足協許可,改為代表布隆迪 (Burundi) 。


比拉軒奴於東非國家布隆迪出生,但10歲時與兄弟姊妹跟隨母親到英國政治庇護,逃離充滿戰亂嘅家鄉。布隆迪位於東非內陸,被盧旺達、坦桑尼亞及剛果民主共和國包圍,國內長年飽受內戰煎熬,政府軍與最後一支反政府武裝勢力直至2006年先簽署停火協議。喺足球方面,布隆迪世界排名148位,最高曾經達到96位,從未打入世界盃決賽周,亦從未打入非洲國家盃決賽周,只曾出戰次一級嘅2014 非洲國家錦標賽 (African Nations Championship) 分組賽。

《BBC》指,比拉軒奴將可以入選布隆迪於9月7日對加蓬嘅非洲國家盃外圍賽名單,爭取為祖國打入決賽周。

Source: BBCGuardianBurundi national football team/Wikipedia

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→