【足總很忙】哥帥曲克球員通道激烈爭執 阿古路與球迷推撞或遭秋後算賬

睇足365 於 20/02/2018 發表 收藏文章
喺英格蘭足總盃第五圈,曼城作客爆冷以0-1不敵英甲球隊韋根。呢場波有大把焦點值得講,例如係韋根連續三次喺足總盃擊敗曼城,佢哋亦都喺今屆賽事連續三圈淘汰英超球隊。喺比賽中,曼城左閘戴夫喺完半場前,直接領紅被逐,引發曼城主帥哥迪奧拿同韋根主帥激烈爭執,賽後又有韋根球迷衝落草地慶祝,同阿古路發生衝突,全部都有可能受到足總調查及秋後算賬


戴夫紅牌惹兩主帥激辯

事緣係喺上半場尾段,曼城左閘戴夫出腳攔截犯規,球證本來拎出一張黃牌準備舉起,但臨時改變主意,換返張紅牌,直接將戴夫趕出場。當時,韋根主帥保羅曲克 (Paul Cook) 喺場邊不斷要求球證俾紅牌,懷疑因為咁樣而引起曼城主帥哥迪奧拿不滿。


兩位主帥於是開始爭吵,半場休息時,兩人一直將火藥味帶到入球員通道。根據《BBC》片段兩人喺返回更衣室時爭執,後來韋根主帥保羅曲克表現激動,而且看似同哥帥以外嘅人都有鬧交,最後有曼城職員將兩人隔開,各自返入更衣室。報導指出,足總會就事件聽取主球證安東尼泰萊報告,決定有冇必要處理呢次事件。

loading
loading


賽後球迷衝落草地
賽後,主隊球迷眼見身處英甲嘅球隊再一次擊敗曼城,當然極度興奮,其中一部分更衝落草地大肆慶祝。其中一幕被鏡頭捕捉到,阿古路大動作用手推開一名韋根球迷,可能令佢惹上麻煩。從影片睇見,當時呢名球迷十分接近阿古路,暫時未能證實佢係咪上前挑釁、侮辱或攻擊阿古路,但就肯定拍到阿古路有所動作,相信佢將會接受足總調查。

https://youtu.be/cyxmVGY-dig
另一方面,韋根都難以獨善其身,因為佢哋嘅球迷太過興奮,喺賽後大舉衝落球場慶祝,而部份曼城作客球迷向草地投擲雜物,同樣會受到足總調查。


至於兩名主帥,事後十分有「默契」,齊齊淡化爭議,話只會講返場波。哥帥就承認戴夫應該拎紅牌:「係紅牌,呢球係紅牌,冇錯……球證作出咗佢嘅決定。

你哋想問關於足球嘅事,可以隨便問。球員通道入面咩事都冇發生。」

韋根主帥保羅曲克就話:「我又唔係球證,場上有四個球證,佢哋都覺得要俾紅牌。我諗我哋應該講返場波,今日對韋根嚟講係偉大嘅一晚。」

Source: BBCTelegramDaily Mail

如果喜歡我們的文章,請即分享到︰

標籤: 足總盃  曼城  韋根  戴夫  保羅曲克  哥迪奧拿  

留言


請按此登錄後留言。未成為會員? 立即註冊
    快捷鍵:←
    快捷鍵:→