賓施馬稱基奧特只係「高卡車」,基奧特神回應不出惡言已證明為何自己取代對方

睇足365 於 01/04/2020 發表 收藏文章
皇家馬德里前鋒賓施馬能夠穩佔皇馬正箭頭位置近十載,自有過人之處,但佢喺場外嘅行為頗多爭議,喺場內嘅表現亦唔見得人人欣賞,不過佢似乎對自己能力充滿自信,最近於個人社交媒體上,竟然公開指法國國家隊前鋒基奧特不配與自己比較。


賓施馬近日同樣因疫情而要喺屋企休息,佢悶起上嚟就喺Instagram上開直播,其間有球迷問佢,覺得基奧特同佢比較點樣,賓施馬竟然咁樣答:「你唔會將一架 F1 一級方程式賽車同一架高卡車 (go-karting,小型賽車) 比較,我咁講已經好好人。

當然,我係指我係一架F1。

佢嘅實力就係咁多,唔會有啲咩好精彩嘅表演,但佢係有佢自己嘅一套。除此之外,有冇人鍾意佢嘅踢法呢?我唔知囉。」

言論引起爭議之後,賓施馬仲堅持唔改口,回應死撐:

「關於基奧特,我只係講事實。冇人記得我有提及佢對國家隊嘅貢獻,大家只係記得我講佢係高卡車。呢個確實係我嘅諗法,亦係事實,因為如果你問我,我同「大哨」朗拿度邊個勁啲,我都會話佢係F1,我係高卡車,實情就係咁。」

loading


關於賓施馬嘅言論,有人認為佢自己妒忌基奧特取代佢成為法國國家隊主力中鋒。事實上,賓施馬除咗曾涉嫌嫖雛妓被起訴,又涉嫌以性愛片段勒索國家隊隊友華布拿,令法國隊主帥迪甘斯果斷決定永不錄用呢名皇馬前鋒,賓施馬此後亦不時大放厥辭,包括聲稱如法國允許自己轉籍代表阿爾及利亞,將會見到自己嘅能力等;相反,曾帶領蒙彼利埃勇奪法甲冠軍兼取得神射手嘅基奧特就係一位平民英雄,佢向來謙厚,從來都係默默耕耘,即使多年嚟飽受質疑,亦從未以負面言語回應批評聲音,只係專注於用表現證明自己。

根據《BeSoccer》報導,基奧特今次嘅回應係咁:「有人話 F1唔可以同高卡車比較,我唯一可以講嘅就係我係世界盃冠軍,咁對一架高卡車嚟講都唔錯呀!」呢個就係EQ同IQ,可以想像,如果換轉係賓施馬俾人話係高卡車,佢一定大怒反擊,再講到自己天上有地下無,基奧特根本冇刻意否認自己係高卡車,而係用返上面講嘅態度,用球場上嘅表現去代替說話,鬧人寸人就唔需要講得咁白,以退為進先係高招,淨係做人嘅智慧已經解釋咗點解捧世界盃嘅係基奧特而唔係賓施馬。

loading


有人或者唔認同,因為佢哋覺得基奧特只係因為賓施馬得罪迪甘斯先可以喺國家隊上位,呢一點難以客觀地證明或否定,但唔好忘記一個球員可以配合團隊發揮係好重要,而基奧特嘅入球能力雖然備受質疑,但策應能力係佢嘅長處 (想深一層,呢個亦係好多人對賓施馬嘅評價) ;話雖如此,基奧特喺國家隊嘅場均入球數字 (97場39球 = 場均0.40球) 其實高於賓施馬 (81場27球 = 場均0.33球)。最重要嘅係,賓施馬可能真係高過基奧特一班,但你遠遠未勁到有資格咁樣去踩低人。

loading
loading


最後,要提醒賓施馬一點,佢話基奧特唔識踢靚波,證明佢冇睇過基奧特踢波,阿仙奴時期嘅基奧特最擅長就係踢「彈彈波」,有好多精彩配合,更奪得2017普斯卡斯獎 (完整片段於gif圖下方)。

https://i.imgur.com/RZ9JWt3.gif
https://i.imgur.com/dSMI2nP.gif

2017普斯卡斯獎得獎入球
https://www.youtube.com/watch?v=wGOhxt5Ksc0
基奧特招牌「彈彈波」
https://www.youtube.com/watch?v=odxh_ZEUPlQ
Source: GoalBeSoccer

如果喜歡我們的文章,請即分享到︰

留言


請按此登錄後留言。未成為會員? 立即註冊
  • 黃霖鏗 於 02/04/2020 評論 NO. 1

    到弓。

快捷鍵:←
快捷鍵:→