談史摩寧與鍾斯,維迪:「最衰我同里奧幫佢哋唔到」

睇足365 於 11/03/2018 發表 收藏文章
前曼聯隊長尼曼查維迪近日接受訪問,談到兩位曼聯後輩嘅表現。不少球迷都認為,曼聯一對英格蘭中堅史摩寧同菲爾鍾斯,表現屢有不穩,更有球迷認為兩位都屬於「炸彈」級別,雖然小弟認為佢哋未至於咁差,但佢哋未俾到人十足信心係事實。


史摩寧同菲爾鍾斯當年分別喺2010及2011年加盟曼聯,時任領隊費格遜希望培養兩人成為維迪同里奧費甸南嘅接班人。費格遜原意係安排兩人跟隨兩位前輩學習,一齊訓練及輪流喺前輩身邊上陣累積經驗。


不過,里奧費甸南當時長期受到背傷困擾,而維迪亦喺2011年底遭遇十字韌帶重傷,或者令曼聯被逼「揠苗助長」,結果兩為年輕中堅喺缺乏前輩充足指導之下就要為曼聯擔正。二人起初確實有不俗潛力,但現時已經分別年屆28及26歲,仍然遠遠未見兩位前輩嘅影子。


維迪認為,正正係因為自己同里奧費甸南嘅長期缺陣,令史摩寧及鍾斯未有預期嘅成長,佢哋喺未有老大哥陪同喺身邊嘅情況下踢咗太多比賽:

「咁樣冇辦法幫助佢哋成長,因為佢哋比賽嘅時候,冇一個更具經驗嘅球員喺身邊提點佢哋。

呢樣嘢唔係單純同一個老將一齊上陣咁簡單。

當鍾斯24歲嗰陣,如果身邊嘅拍檔係34歲嘅老將,34歲嗰位老將會比佢更依賴頭腦去比賽。

要進步嘅話,佢需要有適當嘅鼓勵,亦都要踢得舒服。」


維迪又認為,年輕球員好容易因為場上嘅不確定性而失去信心:

「如果你失去信心,就會開始諗 我應該喺呢度、嗰度、定呢度?咁就會變得好難踢。

其實就算佢犯錯,都要有個人幫佢,同佢講冇問題,不過佢24歲嘅時候我已經唔喺球隊喇。」

的確,年輕球員犯錯好平常,但當佢犯錯時,身邊拍檔係更有經驗而且有能力幫佢「執漏」嘅前輩,佢就可以從錯誤中學習,越踢越有自信。相反,如果身邊拍檔同樣唔係能夠一夫當關嘅人,只會輪流出錯,佢哋每一次犯錯可能都要付出失波同輸波嘅代價,只會越踢越怯,更加唔會俾到人信心。

Source: ESPN

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • wombat
    wombat 於 11/03/2018 評論 NO. 1

    講得啱。不過呢個就係佢哋嘅命運

快捷鍵:←
快捷鍵:→