【認真可悲】沉淪保頓財困拖糧,球員罷踢最後兩輪英冠比賽

睇足365 於 27/04/2019 發表 收藏文章
英格蘭老牌球會漸漸沉淪嘅例子有唔少,好似查爾頓而家仲喺英甲,史篤城、諾定咸森林、布力般流浪、伯明翰、雷丁、韋根、昆士柏流浪、保頓等就喺英冠聯賽榜下半版,其中今次主角保頓已經鐵定降班。常言道「有錢唔係萬能,冇錢就萬萬不能」,喺足球上就十分明顯,球會暴發未必好快有成績,但財困就九成會沉淪。


保頓喺第43輪英冠賽事中以0-2不敵阿士東維拉,提早宣布將會降落英甲作賽。保頓職球員上下士氣低迷絕對有跡可尋,因為「保頓出糧」,已經多次成為新聞標題。換言之,保頓喺今年已經連續多個月拖欠球員薪金。



保頓職員及球員早前仍然未收到3月份薪金,球員為聲援球會職員,發起罷操罷賽,成功逼使球會向一般職員發放3月薪金,但球員仍然未獲出糧,英格蘭職業球員工會 PFA 宣布支持保頓球員嘅工業行動。結果喺原定英國時間星期六舉行嘅英冠賽事保頓對賓福特,一度以為要被逼取消。不過,英格蘭聯賽會下令,保頓必須盡一切可能安排合資格球員 (如U18球員),完成餘下兩場聯賽,安排額後進行,並且將會就保頓違反紀律而作出聆訊。



由於陷入財困,保頓已尋求股權易手多時,根據球會聲明,潛在未來班主Laurence Bassini已同意接手注資球隊,但球會暫時未收到所需資金。未來班主Laurence Bassini回應《Sky Sports》查詢,公開承諾佢將會負責向被拖欠薪金嘅球員支薪,但需要等到買盤手續完成後先可以處理到,佢指責現任班主Ken Anderson管理不善,喺賣盤手續上又多番拖延。Laurence Bassini承諾,將會令球員重新返到球場上,又對球隊嘅將來充滿信心。值得留意,Laurence Bassini曾經係屈福特易手保素家族前嘅班主,佢曾經兩次宣布破產,兼被禁止參與足球活動三年。




Source: Sky Sports
https://www.skysports.com/football/news/11672/11704328/laurence-bassini-says-he-will-pay-bolton-players-march-wages-before-brentford-game
https://www.skysports.com/football/news/11672/11704618/bolton-vs-brentford-postponed-over-unpaid-wage-row
Laurence Bassini

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→