話口未完尼馬又傷,料將再次於妹妹生日期間缺陣

睇足365 於 12/02/2021 發表 收藏文章
話說小弟喺半個月之前就曾經分享過一則新聞,內容係關於剛剛上任成為巴黎聖日耳門主帥嘅普捷天奴,表示願意考慮喺某個時期,放尼馬一個小假期(《教豪門最緊要識做人?肥普稱考慮放尼馬參加妹妹生日會》)。眾所周知,佢所講嘅就係每年二月尾三月頭呢個時間,尼馬都會想去參加妹妹嘅生日派對,而過去幾年佢都「巧合地」喺呢個時期受傷或停賽。喺上一篇文章入面,小弟睇過賽程,認為由於PSG要喺3月10日歐聯16強首回合面對巴塞隆拿,所以對於普捷天奴會否放人感到懷疑,點知就喺最近呢幾日,「奇跡」又出現了!

相信緊貼球壇新聞嘅球迷,如果連「八卦新聞」都唔放過的話,一定會知道尼馬嘅「三月詛咒」,就係佢必定會喺二月底至三月初因為受傷或者停賽等原因缺陣,然後受傷嘅佢又會搭飛機去參加妹妹嘅生日會。之前嘅報道統計發現,尼馬除咗出席妹妹3月11日嘅生日派對之外,多數亦會出現喺相近日子舉行嘅里約嘉年華(Carnaval do Rio de Janeiro),而佢自2013年由山度士加盟巴塞隆拿開始,只有第一年即2014年「安份守紀」,其後呢個時間嘅紀錄如下:2015年停賽、2016年停賽、2017受傷、2018受傷、2019受傷;唯獨2020年佢雖然於聯賽停賽,但於3月11日佢罕有地為球隊於歐聯上陣並攻入一球。


橫掂大家都知咩事,早前就有記者問普捷天奴會唔會放尼馬去參加妹妹生日派對,普捷天奴嘅意思大約就係話,溝通係好重要,有需要不妨提出,佢願意認真考慮下。不過你話平時法甲休息一兩場就話冇所謂啫(其實PSG今季喺法甲都不能鬆懈,24輪後仲排緊第3位),但妹妹生日嘅正日係要踢歐聯,而且對手係巴塞隆拿,相信尼馬想透過「商量」而獲批放假的話,絕對冇可能成功。

loading

結果,尼馬喺日前進行嘅法國聯賽盃中上陣,60分鐘因傷退下火線。賽後,PSG官方透露,尼馬大腰內收肌受傷,最少需要休息四個星期。對一對月曆,由2月10日開始計,四個星期,一個月,啱啱好3月10日,會唔會咁啱咁準?其實球員受傷之後,球會應該會用科學儀器檢查,所以要詐傷又好似唔係咁容易,定係尼馬真係中咗詛咒?一次半次就巧合,但連續咁多年都有嘢發生,又真係好邪喎!一齊睇下3月11日嗰場歐聯,尼馬會唔會趕及復出,打破陰謀論!

loading

loading
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→