評「雙紅」最佳11人 加利佬揀普巴被加歷查恥笑:「都係搵位擺個曼聯球員落去啫」

睇足365 於 11/12/2018 發表 收藏文章
英國時間周日,英超將會上演利物浦對曼聯嘅「雙紅會」大戰,《Sky Sports》曾經各自效力呢兩間球會嘅一對「歡喜冤家」加歷查同加利尼維利,就預先喺著名節目《Monday Night Football》上挑選「雙紅」最佳11人。


兩位各自都係 "one club man" ,自然對球會偏心,不過今季相信加歷查揀出以利物浦為大多數嘅11人,都唔會俾人鬧佢太偏心,因為利物浦而家係英超唯一一隊仍然不敗嘅球隊,暫時佔據榜首席位,當然有唔少球員表現出色;相反,曼聯表現不穩,此刻已經被紅軍拉開16分差距,「加利佬」要喺呢個聯合最佳11人中「安插」曼聯球員都唔係易事。


「加利佬」喺自己挑選嘅陣容中揀出迪基亞、拜利、普巴及馬迪爾,共四位紅魔球員,當講到普巴嘅時候,「加利佬」話會將佢擺喺 "holding midfield" (墮後中場) 位置上,講完自己都窒一窒,加歷查馬上笑出嚟 "Holding what? Oh my god! He is the most undisciplined player of all-time! " ,意思大約係「你搵佢打防中?防鬼防馬咩?佢係史上最冇紀律嘅球員!」

https://i.imgur.com/4Gi5Kdo.gif

其實「加利佬」自己都忍唔住笑,佢解釋話其實都係搵個位擺返個曼聯球員喺中場,不過佢話認真覺得普巴係兩隊中場球員入面最有天賦嘅球員。

至於加歷查,佢只係揀咗兩個紅魔球員,就係迪基亞同馬迪。加歷查話佢揀馬迪係因為佢係一個有級數、有冠軍嘅正宗防守中場,認為佢係兩隊入面最強嘅防中,不過就唔會揀普巴做佢拍檔,而揀咗占士米拿,因為普巴唔會逼搶。


最終,兩位選出嘅陣容有七個人選相同 (迪基亞、阿歷山大阿諾、雲迪克、羅拔臣、拿比基達、沙拿及費明奴) ,而《Monday Night Football》節目共識嘅最佳11人,就係迪基亞、阿歷山大阿諾、雲迪克、拜利、羅拔臣、拿比基達、馬迪、普巴、沙拿、費明奴及文尼,共有四個曼聯球員、七個利物浦球員。


節目影片
https://streamable.com/e8tyg
Source: Sky Sports

如果喜歡我們的文章,請即分享到︰

留言


請按此登錄後留言。未成為會員? 立即註冊
  • kinfung 於 11/12/2018 評論 NO. 1

    on99,迪基亞表現好過艾利臣?拜利表現好過高美斯?馬迪今季踢成感都有得入,吹脹。計我話兩隊最佳11人應該係,羅美路、達米安、屎波寧、連迪懦夫、楊格、馬迪、連加特、廢特、盧卡古、山齊士、拉舒福特啦

快捷鍵:←
快捷鍵:→