被投閒置散的安利簡終離隊,將重返德甲投多蒙特

睇足365 於 31/01/2020 發表 收藏文章
祖雲達斯中場安利簡 (Emre Can) 幾乎已成為球壇失蹤人口,佢今季喺祖雲達斯可謂完全失去位置,只有兩次聯賽正選上陣機會,連盃賽都冇得踢,可以預期26歲嘅佢需要離隊尋求上陣機會,隨著轉會窗即將關閉,佢嘅去向亦即將揭曉。雖然傳聞有多間大球會對佢有意,但事情未必可以順利進展。


安利簡於2018-19球季由利物浦轉投祖雲達斯,當季尚算球隊主力之一,共於各項賽事上陣37場,其中聯賽上陣29場,20次正選。不過新球季遇上球隊更換主帥,球隊於夏天引入拉比奧特及艾朗藍斯兩名中場,安利簡於沙利帶領嘅祖雲達斯已無立足之地。今季,安利簡不僅只喺聯賽上陣8次 (其中兩次正選),場均不足35分鐘,更不獲註冊參加歐聯,已預示離隊結局。

根據多個傳媒報導,英超球會有興趣羅致安利簡,包括曼聯、熱刺及愛華頓,但呢位前利物浦中場選擇重返德甲,甚至願意降薪加盟多蒙特。多蒙特體育總監索克早前稱,多蒙特須與時間競賽,球會對安利簡有興趣已經唔係秘密,但暫時未有任何事情得以落實。

據悉,當時多蒙特與祖雲達斯正就轉會費問題拉鋸。不過,隨著多蒙特將射手柏高艾卡沙賣到西甲維拉利爾,多蒙特得以提高對安利簡嘅報價,令交易進入最後階段。根據《Goal》報導,多蒙特與祖雲達斯達成協議,先租借安利簡至季尾,其後可以3000萬歐元買斷。

loading


安利簡職業生涯初期曾效力拜仁慕尼黑及利華古遜,佢將會喺日內抵達多蒙特進行體檢,並落實加盟。一切順利的話,安利簡將可望於星期六德甲,多蒙特對柏林聯一仗候命。德國隊將於今夏出戰歐國盃決賽周,重返德甲爭取表現正係安利簡當務之急。

Source: Goal

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→