著名記者Di Marzio爆料:丹尼斯蘇亞雷斯接近加盟阿仙奴

睇足365 於 05/01/2019 發表 收藏文章
阿仙奴中場位置看似人才濟濟,但其實需要應付多位球員前途未卜、傷病等變數,因此已經傳出將會喺一月轉會窗引入一位中場球員。根據最新消息,阿仙奴正領先丹尼斯蘇亞雷斯嘅爭奪戰,而球員本人亦較傾向加盟兵工廠。


著名足球記者 Gianluca Di Marzio 以報導獨家轉會消息聞名,佢最近喺個人網站上發表一則消息,題為 "Barcelona's Denis Suarez close to joining Arsenal" ,指巴塞隆拿中場丹尼斯蘇亞雷斯接近加盟阿仙奴。

Gianluca Di Marzio 指出,丹尼斯蘇亞雷斯於巴塞隆拿上陣機會寥寥可數,令佢希望尋求一個適合自己發展嘅新環境,丹尼斯蘇亞雷斯認為曾經於西維爾合作嘅阿仙奴主帥艾馬利,可以協助佢重回正軌,令阿仙奴成為佢嘅首選, Di Marzio 亦相信阿仙奴將會付緒行動向巴塞提出報價。

24歲中場丹尼斯蘇亞雷斯曾經於曼城青訓系統發展,及後轉投巴塞B隊。2014-15球季,丹尼斯蘇亞雷斯被外借到西維爾一年,與時任主帥艾馬利合作並得到重用,年約20歲嘅佢首次得到長期踢一隊比賽嘅機會,第二季被巴塞賣到維拉利爾同樣屬於主力球員,成功吸引巴塞將佢回購。不過自2016-17回歸巴塞以嚟,丹尼斯蘇亞雷斯得到機會唔多,上陣機會每況愈下,直至今季只曾於聯賽上陣2次、合共17分鐘,連同各項賽事亦只踢過221分鐘。


早前根據《BBC》阿仙奴消息專家者 David Ornstein 報導,阿仙奴中場艾朗藍斯正同祖雲達斯、皇家馬德里、國際米蘭、拜仁慕尼黑及巴黎聖日耳門展開談判,但相信佢喺今個一月離隊機會唔大。不過另一方面,阿仙奴中場線上仍有奧斯爾前途未卜,米希達恩就需要休戰至2月中,綜合多個因素,阿仙奴絕對有理由未雨綢繆,於中場位置上增兵,因此近期一度傳出阿仙奴將會引入同屬艾馬利舊迎嘅班尼加。然而, David Ornstein 認為,阿仙奴於一月轉會窗可動用資金有限,較大機會以外借方式引入巴塞中場丹尼斯蘇亞雷斯等潛在目標。


Source: gianlucadimarzio.comfootball-italiaBBC

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→