「英超殺手」賓耶達首次入選 法國國家隊公布最新名單

睇足365 於 16/03/2018 發表 收藏文章
英超球隊曼聯喺啱啱過去嘅歐聯16強次回合中,於主場被西維爾淘汰,後備上陣嘅西維爾射手賓耶達 (Wissam Ben Yedder) ,短時間內梅開二度,風頭一時無兩,佢今季喺歐聯分組賽亦曾對利物浦連中三元,因此對英超「Big 6」球隊累積五個入球,成為本周話題。

loading

呢位27歲嘅法國前鋒今次可謂吐氣揚眉,因為佢喺2012年為法國U21上陣之後,就冇再為國上陣,但憑住今季表現終於得到法國主帥迪甘斯賞識,獲首次征召入最新國家隊名單,成為大國腳。


賓耶達身高只有1米70,20歲先由法國第五組別球隊加盟圖盧茲,直至2016年就轉會西甲球隊西維爾。加盟西維爾以嚟,佢為球隊上陣76場射入37球,不過喺西甲賽場上入球率就唔算突出,今季西甲上陣19場只錄得6球1助攻,去到歐聯就如魚得水,7場射入8球。

迪甘斯就解釋,並非因為佢對曼聯嘅兩個入球就決定首次選佢入隊:

「唔係因為佢喺奧脫福嘅兩個入球就改變一切,即使呢兩球係佢嘅努力所得返嚟。歐聯係一項頂級賽事,佢為球隊贏得比賽,不過呢個都係對佢近幾個球季良好表現嘅一個肯定。

佢可能擁有一個非典型嘅職業生涯,佢生涯由室內五人足球 (Futsal;賓耶達2010年曾經代表法國室內五人足球國家隊) 開始,同11人足球嘅技術要求好唔同。不過佢有好低嘅重心,同埋細膩嘅技術。


佢的確制空力較弱,但喺門前把握力強。佢因為對曼聯一仗而成為焦點,但佢一直都有穩定嘅入波,佢走位十分有智慧,速度亦都好快。你可以喺佢入曼聯嘅第一球睇到呢點,佢面對住拜利,一個有經驗嘅守將,左腳右腳對佢嚟講都唔係問題。」

賓耶達就喺Twitter上面表示好興奮終於可以成為大國腳。
loading


除咗賓耶達之外,22歲馬體會後衛盧卡斯靴南迪斯 (Lucas Hernandez) ,同樣獲首次征召。

法國國家隊將會於月底與哥倫比亞及俄羅斯友賽,完整名單如下:

門將
艾路拿(PSG)、洛里斯(熱刺)、文丹達(馬賽)

後衛
迪治尼(巴塞隆拿)、盧卡斯靴南迪斯(馬德里體育會)、甘佩比(PSG)、哥斯尼(阿仙奴)、柏華特(史特加)、薛迪比(摩納哥)、烏姆迪迪(巴塞隆拿)、華拉尼(皇家馬德里)

中場
簡迪(車路士)、利馬(摩納哥)、馬杜迪(祖雲達斯)、普巴(曼聯)、拉比奧特(PSG)、杜利素(拜仁慕尼黑)

前鋒
賓耶達(西維爾)、丹比利(巴塞隆拿)、基奧特(車路士)、基沙文(馬德里體育會)、馬迪爾(曼聯)、麥巴比(PSG)、泰奧雲(馬賽)

*譯名以馬會球員名單為參考

loading


Source: ESPN

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→