英超必將辦自家Netflix式串流服務,繞過電視台直接吸金

睇足365 於 10/02/2020 發表 收藏文章
近年網上串流影片平台大行其道,大量觀眾付費訂閱Netflix等平台,觀看劇集及電影,越嚟越多品牌亦都紛紛加入打算分一杯羹,就連香港「大台」亦都仿傚。網絡串流技術提升、新世代觀影模式改變,種種轉變都反映舊有影視經營模式已走向夕陽。當初英格蘭超級聯賽獨立,電視轉播費分成正正係一大誘因,隨著電視轉播模式進入新時代,英超亦將會迎來革新。


根據《Guardian》報導,英超新任行政總裁 Richard Masters 透露,英超正研究開設一個自家付費訂閱平台,令英超得以喺海外市場取得直接收益。Richard Masters 稱,可以肯定呢個模式將會喺未來實行,但未有確實時間表。

Richard Masters透露,早喺現行服務競標周期—— 2019-2022球季 ——嘅招標階段,英超已經投入大量時間及資源研究服務直接顧客嘅可行性,但喺考慮是否於個別海外試驗時,認為未係時候,不過又指相信英超已經準備好,下一次有機會時可以行動。

《Guardian》報導指,英超現時每季透過轉播費賺取31億英鎊,其中14億英鎊來自海外轉播收益。由於海外電視台必然從中取利,如英超於海外採用自家平台直接向用家收費,將可大幅提升利潤,例如新加坡電視台Singtel每年向英超支付7000萬鎊,但Singtel每年從用戶訂閱英超賽事賺取1.75億鎊,若英超自行經營,按理可以直接於新加坡得到額外1億鎊收益。

現時,英超於英國嘅轉播權分散於Sky Sports及BTSport,由2019年12月開始,Amazon Prime加入英超轉播市場,Amazon Prime用戶可以喺比賽時自由選擇英語旁述或球場現場收音,感受球賽現場氣氛,更可隨時於旁邊調用球賽數據、名單、精彩重播等功能,大受好評。



不過,Sky Sports及BTSport於當地市場地位不可動搖,更與英超有直接利益關係,因此Richard Masters認為短期內唔會喺英國實行自家串流服務,但會於部分海外市場推行:「我唔係話呢樣嘢會喺下一個周期發生,或者幾時會發生,但係最終英超都會走向一個直接及媒體轉播混合模式。暫時仍然未可以肯定幾時開始。」



現時,足球直播服務主要係按個別地區銷售,每個地區用戶向當地投得轉播權嘅平台訂閱,但近年已出現例如 DAZN 、Amazon Prime等 Over-The-Top (OTT) 網絡串流平台,以直接、video-on-demand (VoD) 形式播放足球賽事,由於不經傳統廣播渠道,一個平台嘅服務對象可以包括多個國家及地區,唯一限制只係合約及版權條款。
Source: Guardian

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→