【老細技癢】碧咸落場練波大show七旋斬

睇足365 於 14/03/2021 發表 收藏文章
香港打工仔壓力大,好多人對老闆上司心存不滿,認為佢哋工作能力低下,更有「腦細」戲稱。不過喺足球界就唔係咁講法,好多教練都係紅褲子出身,去到四五十歲教波嗰陣都仲寶刀未老,例如執教皇馬嘅施丹係一代球王級人馬,傳聞試過喺操練中用罰球神技令C朗拿度心服口服,又傳聞而家皇馬班球員想搶佢波都有難度;今次仲勁,係由老細出馬,擁有美職聯球隊國際邁阿密嘅碧咸,喺訓練場上施展招牌七旋斬,到時邊個踢得唔好,老細可以話「行開等我嚟啦!」。


國際邁阿密正在準備新一季美職聯,佢哋上一季初試啼聲撞正疫情,表現麻麻,不過班主碧咸籌備多年,一定會大搞!上季後段佢哋搵嚟法國國腳馬度迪,以及阿根廷射手希古恩(希古恩兄長費迪力高希古恩同樣在陣),今季再搵嚟本來執教英格蘭女子國家隊嘅「七小福」另一員菲臘尼維利擔任主帥,睇下會唔會刷出咩新火花。

loading

最近,國際邁阿密展開季前操練,碧咸不時現身於訓練場上督操,早前試過喺熱身期間同「菲臘佬」邊吹水邊「的」波,大曬腳法。去到今次,球員休息嘅時候,佢將場邊一個足球,輕鬆斬向門框,省中門楣,完成crossbar challenge展示招牌絕技七旋斬,證明隻右腳從來冇一日荒廢過!

loading

loading

好彩呢一幕俾攝影師拍下,仲同佢講我「影低咗喇!」,咸爺用手指公回應,之後仲post上個人instagram話 “Crossbar Challenge Still got it ”,可惜阿仔就柴老竇台,留言話「拍咗幾多take先?」「咁近容乜易呀?」,好彩好多球迷都大讚,同埋馬度迪亦十分識做,留言「老細!」表示讚嘆。不過影片所見,班球員好似冇乜人理佢,係睇唔到,定係睇慣曬呢?


早兩年施丹就試過即場叫碧咸斬波,結果佢喺中場一樣擊中門楣,令人嘆為觀止。

https://youtu.be/mgJ7TG2yNjw

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→