網民發現疑似曼聯球員「英超Fantasy」聯賽,最高分竟是「屎波寧」

睇足365 於 22/08/2019 發表 收藏文章
英超官方舉辦嘅 "Fantasy Premier League" 遊戲一向十分受歡迎,遊戲玩法好簡單,玩家只要拎著手頭上有限資金,買入球員組成出賽陣容,遊戲就會按照球員喺真實英超比賽中嘅表現計算分數,而由於玩家資金有限,加上只可從每支英超球隊選擇三人,所以冇可能堆砌出全明星陣容,選擇平價中下游球員嘅眼光隨時成為勝敗關鍵。

遊戲最好玩當然係互相比拼,玩家可以開設及加入不同聯賽,與朋友鬥高分。近日外國社群網站 Reddit 就有網民喺遊戲中搵到疑似係部分曼聯球員私下「互片」嘅私人聯賽,名叫 "MUFC Tiki-Taka Fantasy" ,大家可以自行上 "Fantasy Premier League" 搵到呢個聯賽 (連結: https://www.reddit.com/r/reddevils/comments/ct82wy/someone_found_uniteds_own_fantasypl_league/)。聯賽內有9位玩家,名字全部都係曼聯球員,其中以英格蘭球球員為主,例如菲爾鍾斯、梳爾、史摩寧、楊格等,連今年夏天加盟嘅麥佳亞、丹尼爾占士亦有參賽,有網民相信玩家 "Tiki Taka Legend" 嘅真正身份係安達斯佩雷拉。


當然,筆者認為仍然有一個可能性,就係有一班朋友自己用曼聯球員個名做網名,然後一齊玩呢個遊戲,所以只能夠話係「疑似」曼聯球員。不過,經過粗略查證之後,個人傾向相信佢哋真係曼聯球員。以呢個聯賽中名為 "Chris Smalling" 史摩寧嘅玩家為例,筆者發現佢仲喺一個名為 "Red Army" 聯賽嘅成員, "Red Army" 嘅其他成員有 "Phil Jones" 、"luke shaw" 兩位同樣係曼聯球員個名;另外, "Robin Thorpe" 、"Paul Brand" 、"Gary Walker" 等玩家個名都同一啲現任或前任曼聯職員名字相同 (例如Gary Walker擔任曼聯head of strength and conditioning,即大約等於體能教練主管,長達11年,半年前離職) ,如果一班普通球迷扮演曼聯球員,仲要扮埋幕後職員咁有深度,真係抵俾佢哋呃到!

講返正題,喺呢9名疑似紅魔球員之中,暫時過去兩周英超累積分數最高嘅係史摩寧!佢兩個星期累積138分,一齊睇睇佢陣容:


睇嚟史摩寧都知道自己冇得出場,所以喺後防線上冇揀自己,另外揀咗三位紅魔球員,分別係迪基亞、馬斯亞同格連活特,而佢最高得分嘅球員係曼城嘅迪布尼,單周拎到11分。

不過其實史摩寧並非第二周最高分,而係菲爾鍾斯同梳爾,佢哋同樣喺第二周拎到60分,所以佢哋個陣容可能更有參考價值,共通點就係一樣冇揀自己、一樣揀咗格連活特、一樣靠曼城球員拎好多分:

另外,有網民整理出一份已知職業球員嘅FPL名單及分數排行 (連結: https://www.reddit.com/r/FantasyPL/comments/csyjkt/football_players_and_their_fpl_teams/),暫時以白禮頓中堅沙恩杜菲 (Shane Duffy) 分數最高。


Source: Reddit

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→