約10日前曾與夏蘭特互串,西維爾門將94分鐘入波做英雄

睇足365 於 22/03/2021 發表 收藏文章
通常去到比賽最後階段,落後緊嘅一隊,獲得罰球或角球機會時,都可能會叫門將上埋去搏一鋪,希望多一個球員入禁區威脅對手,但真正可以有波嘅,真係要配合天時地利人和,當然好多球迷都記得睇過一啲經典嘅門將入球片段,例如舒米高就曾經入過波,而以下一段合集亦睇到好多門將攻入嘅靚波,包括南非門將Oscarine Masuluke曾經射入一球倒掛金勾世界波絕殺,獲得提名2017普斯卡斯獎,最後以第2名,輸俾基奧特嘅金球。事實上,喺歐洲五大聯賽真係好少睇到門將後上入波(今季西甲球隊伊巴曾派門將迪米杜域操刀射入12碼),而啱啱呢個周末西甲就出現咗一球!

門將精彩入球:
https://www.youtube.com/watch?v=CfqpqKYOr2Q
西甲第28輪賽事,華拉度列主場對西維爾,上半場接近完結之際,球證喺VAR協助下認為西維爾喺禁區內防守犯規,撞跌咗對手,判罰12碼,華拉度列由奧利蘭拿操刀射入,領先1-0。其後,西維爾雖然「撳住攻」,但老鼠拉龜,又錯失咗入球機會,包括盧克迪莊門前頭槌中柱彈出,結果去到90分鐘仍然冇辦法追平。

loading

去到93分鐘,西維爾獲得角球機會,門將保奴(Yassine Bounou)都入埋禁區幫手進攻。角球開出後,先係西維爾球員喺尾柱set埋門前,但皮球漏到落另一邊底線,奧斯卡洛迪古斯「撈」返入嚟,華拉度列幾個球員喺門前解唔到圍,一片混亂之下,個波由西維爾嘅官迪喺個波出底線之前,盡力向12碼點位置踢,門將保奴福至心靈捕到靚位,喺小禁區頂冇人看管,一抽入網,幫助西維爾喺接近94分鐘,最後一個攻勢入面絕地追平,拎返一分。


今年29歲嘅保奴職業生涯第一次入波,兼幫到球隊追平,興奮到除衫慶祝,拎將黃牌都冇所謂啦!賽後,西維爾主帥盧帕迪古就話,佢自己後生都係打龍門,但就連練波比賽都未入過波,同埋今場波球隊眼看要全失三分,睇到門將入波追平呢一幕自然好興奮啦。

loading

loading


有趣嘅係,就喺早排,保奴就喺歐聯比賽中同夏蘭特交手,有一幕互串兼賽後握返手嘅搞笑場面。網友就講笑話,估唔到保奴同夏蘭特交手一次,就學到埋門技巧。

https://youtu.be/nMV4lcI1Ewk

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→